Qazaqstanda taý-ken metallýrgııasyndaǵy alǵashqy kásibı biliktilikti taný ortalyǵy tanystyryldy
PAVLODAR. KAZINFORM — Eurasian Resources Group (ERG) Pavlodar oblysynyń Aqsý qalasynda taý-ken metallýrgııa salasyndaǵy alǵashqy kásibı biliktilikti taný ortalyǵyn ashty. Munda birden birneshe másele sheshiledi, olardyń biri — taý-ken jáne metallýrgııa baǵyttaryndaǵy negizgi kásipter boıynsha kásibı quzyretti resmı túrde baǵalaý.
Qazaqstannyń taý-ken metallýrgııa salasyndaǵy kásibı biliktilikti taný ortalyǵy QR Eńbek jáne halyqty áleýmettik qorǵaý mınıstrliginiń qoldaýymen qurylyp, Ulttyq biliktilik júıesi talaptaryna sáıkestendirildi.
Munda metallýrgııa jáne taý-ken ónerkásibi salalaryndaǵy negizgi mamandyqtardyń quzyretin resmı túrde moıyndaý arqyly jumysshy mamandardyń damýyna naqty serpin beriledi.
— Memleket basshysy óz Joldaýynda elimizge jumysshy mamandyqtar boıynsha joǵary bilikti mamandar qajet ekenin atap ótti. Bıylǵy Jumysshy mamandyqtary jyly aıasynda naqty is-qımyldar jasalyp jatyr. Ortalyqty qurý — adamı kapıtaldy damytý jónindegi uzaq merzimdi strategııamyzdyń bir bóligi. Sondyqtan árbir qyzmetker óz deńgeıin resmı túrde rastaı alatyn, kásibı bedelin nyǵaıtatyn jáne óz quzyretiniń eńbek naryǵynda suranysqa ıe ekendigine senimdi bolatyn júıeni quryp jatyrmyz, — dedi ERG Dırektorlary keńesiniń tóraǵasy, Bas atqarýshy dırektory Shýhrat Ibragımov.
Jańa ortalyq qyzmetkerlerge biliktiligin rastaýǵa múmkindik beredi, al kompanııa úshin personal quzyretterin júıeli basqarýdyń, ashyqtyq pen baǵalaýdyń biryńǵaı standarttaryn qamtamasyz etýdiń, sondaı-aq óndiris tıimdiligi men qaýipsizdigin arttyrýdyń tamasha quralyna aınalady.
— Pavlodar oblysynyń Aqsý qalasynda halyqaralyq standarttar boıynsha biliktilikti taný jónindegi alǵashqy ortalyqtyń ashylýyna kýá bolyp otyrmyz. Bul óz kezeginde jalpy halyq úshin, ERG kompanııasy úshin, sondaı-aq óńir ónerkásibi úshin óte mańyzdy, óıtkeni bul ortalyqtar eńbek naryǵynda suranysqa ıe mamandyqtar boıynsha jańa quzyretterdi alýǵa múmkindik beredi, — deıdi QR Eńbek jáne halyqty áleýmettik qorǵaý vıtse-mınıstri Asqar Bıahmetov.
Ortalyqtyń ashylýy Qazaqstannyń taý-ken metallýrgııa kesheni, sonymen qatar Pavlodar oblysy úshin aıtýly oqıǵa boldy. Bul óńir negizgi kásiporyndardyń birazy shoǵyrlanǵan elimizdiń ónerkásip ortalyǵy sanalady.
Bastapqyda 12 negizgi mamandyq boıynsha baǵalaý júrgiziledi: júk ildirýshi, ferroqorytpa balqytýshy, metallýrgııalyq óndiris kranynyń mashınısi, elektrogaz dánekerleýshisi, qolmen doǵalyq dánekerleýshi, elektr dánekerleýshi, qoparýshy, shahter, ekskavator jáne tıeý-jetkizý mashınalarynyń mashınısi, aýyr júk kóliginiń júrgizýshisi.
Osy saladaǵy rásimder zańnama normalaryna baılanysty erikti nemese mindetti túrde júzege asyrylady.
— Oblys ákimi Asaıyn Baıhanovtyń atynan osy aıtýly oqıǵaǵa oraı quttyqtaǵym keledi. Shyn máninde, tarıhı oqıǵaǵa kýá boldyq. Prezıdent jarııalaǵan Jumysshy mamandyqtar jylynda kásibı biliktilikti taný ortalyǵyn ashyp jatqanymyz qýantady, — dedi Pavlodar oblysy ákiminiń orynbasary Aıgúl Malıkova.
Bul ortalyqqa tek ERG qyzmetkerleri ǵana emes, sonymen qatar basqa kásiporyndardyń mamandary, stýdentter, túlekter men merdigerler kele alatynyn aıta ketken jón.
Ortalyqty ashý úshin Aqsý qalasynyń tańdalýy kezdeısoq emes. Sebebi, munda álemdegi eń iri ferroqorytpa óndirýshilerdiń biri ornalasqan, sondaı-aq Toptyń energetıkalyq dıvızıonynyń ortalyǵy bar. Sondyqtan ol baǵalaý protsedýralarynyń yńǵaıly bolýyn jáne óńirdegi mamandar úshin qoljetimdilikti qamtamasyz etedi.
— Kásibı biliktilikti taný ortalyǵy ERG-niń personaldy basqarý jáne damytýdyń tsıfrlyq júıesiniń bir bóligine aınalady. Osy oraıda táýelsiz saraptama nátıjelerin oqytý, mansaptyq ósý jáne jumys oryndary boıynsha qoıylatyn talaptarmen baılanystyramyz. Bul qadamdar kadrlyq sheshimderdi naqty etedi, óndiristegi táýekelderdi azaıtady jáne kásibı deńgeıge arnalǵan jaýapkershilik mádenıetin qalyptastyrady, — dedi ERG-niń Qazaqstandaǵy bas dırektor Serik Shahajanov.
ERG aldaǵy ýaqytta kásipter tizimin keńeıtpek, sondaı-aq Rýdnyı jáne Hromtaý qalalarynda osyndaı ortalyqtar ashýdy josparlap otyr. Munymen qosa, kompanııa biliktilikti taný nátıjelerin ERG-niń korporatıvtik oqytý júıesimen ıntegratsııalaýdy kózdep otyr. Bul óz kezeginde HR júıelerde qyzmetkerlerdiń biliktilik deńgeıin avtomatty túrde esepke alýǵa múmkindik beredi.
Eske salsaq, Memleket basshysy Qasym-Jomart Toqaevtyń Jarlyǵymen 2025 jyl Jumysshy mamandyqtarynyń jyly dep jarııalandy.