Qazaqstanda taý-ken-metallýrgııalyq kesheniniń quzyret ortalyǵy ashylady
ASTANA. QazAqparat - Taý-ken-metallýrgııalyq kesheniniń quzyret ortalyǵynyń quryltaı qujattaryna búgin Astanada ótip jatqan «MINEX Ortalyq Azııa» taý-ken ónerkásibi forýmynda «Innovatsııalyq tehnologııalar parki» avtonomııalyq klasterlik qory men McKinsey halyqaralyq konsaltıngtik kompanııalary qol qoıdy.
QR Investıtsııalar jáne damý mınıstri Áset Isekeshevtiń aıtýynsha, atalǵan ortalyq ındýstrııanyń 4.0 jańa tehnologııalary negizinde jylyna 1200-den astam mamandy daıarlaıtyn bolady. Sonymen qatar McKinsey jáne birneshe basqa kompanııalarmen birge shıkizatty tereń óńdeýge baǵyttalǵan jańa materıaldar ortalyǵyn qurý josparda bar, ol joǵary qosylǵan qun óndirisin damytýǵa múmkindik beredi.
Óz kezeginde, «Innovatsııalyq tehnologııalar parki» avtonomııalyq klasterlik qorynyń basqarma tóraǵasy Sanjar Kettebekov bastapqy kezeńde taý-ken metallýrgııalyq quzyreti ortalyǵynda óńdeý fabrıkasynyń óndiristik jelisindegi jumys modeli ornatylatyndyǵyn habarlady.
«Stýdentter úzdik tájirıbelermen tanysyp qana qoımaıdy, sondaı-aq óndiristik jeliniń tıimdiligin arttyrý maqsatynda onyń jumysyn derbes retteı alatyn bolady. Bolashaqta biz taý-ken kompanııalaryna ken óndirý tıimdiligin arttyrý modýlderin usynýdy jospralaýdamyz», - dep atap ótti ol.
Ortalyqtyń Avtomattandyrý jáne tereń taldaý modýli bıyl iske qosylady. Ol óndiristiń tıimdiligin arttyrýǵa baǵyttalǵan tereń taldaýlar júrgizetin bolady. Modýl iske qosylǵannan keıin óndiristerde qyzmet kórsetý jáne jóndeý qunyn 20-30%-ǵa azaıtýǵa, óndiristiń ónimdiligin 20-25%-ǵa arttyrýǵa, irkilister sanyn 35-45%-ǵa kemitýge múmkindik týady dep boljanýda.
Onyń ústine Ortalyqta Qazaqstannyń taý-ken metallýrgııalyq kesheniniń mamandary daıarlanady, keıin olar bul tájirıbeni óz óndiristerinde engizedi.
