Qazaqstanda tatýlastyrý rásimderin qoldaný salasy keńeıtilmek
NUR-SULTAN. QazAqparat – Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine daýlardy sottan tys jáne sotqa deıingi retteý ınstıtýttaryn damytý máseleleri boıynsha ózgerister men tolyqtyrýlar engizý týraly» zańynyń jobasy birinshi oqylymda maquldandy, dep habarlaıdy QazAqparat tilshisi.
Atalǵan qujatqa Qazaqstan Respýblıkasy Parlamentiniń depýtattary bastamashy boldy.
«Zań jobasy medıatsııa ınstıtýtyn damytý jáne daýlardy retteý kezinde azamattarǵa kómek kórsetý maqsatynda ázirlendi. Zań jobasynyń negizgi erejeleri tatýlastyrý rásimderin qoldaný salasyn keńeıtýge, daýlardy tatýlastyrý arqyly aıaqtaý múmkindigine halyqty neǵurlym belsendi tartýǵa baǵyttalǵan», - dedi Májilisi depýtaty Snejanna Imasheva
Onyń aıtýynsha, qujatta medıatordyń kómegin alıment boıynsha týyndaıtyn daýlarǵa retteýge múmkindik beretin normalar qarastyrylǵan.
«Azamattyq protsestik kodeksine túzetýler taraptar arasynda sol bir zat týraly jáne sol negiz boıynsha medıatıvtik kelisim bolǵan jaǵdaılarda talap-aryzdy qabyldaý ári sotqa qaıtarý rásimderin jetildirýge baǵyttalǵan. Sonymen qatar osy kodekske ajyrasý isterin syrttaı qaraýǵa jol bermeý normalary engizilgen», - dedi depýtat.
Sonymen birge, jekelegen túzetýler medatsııany júrgizý tártibi men tásilin jetildirýge, medıatsııa taraptarynyń quqyqtary men mindetterin naqtylaýǵa, medıatsııa týraly sharttyń nysany men mazmunyna, sondaı-aq medıatorlar uıymdarynyń fýnktsııalaryn aıqyndaýǵa baǵyttalǵan.
«Búginde medıatsııa ınstıtýtyn damytýmen júıeli negizde aınalysatyn birde-bir organ joq. Sondyqtan zań jobasynda tıisti ókiletti organdy aıqyndaý jáne oǵan osy úshin qajetti quzyretter berý usynylady. Bolashaqty bul Aqparat jáne qoǵamdyq damý mınıstrligi bolady dep úmit artamyz», - dedi S. Imasheva.
