Qazaqstanda tasqyn qaıtalana bermeý úshin neshe sý qoımasy kerek

ASTANA. KAZINFORM – Sý resýrstary jáne ırrıgatsııa mınıstrliginiń orynbasary Nurlan Aldamjarov ortalyq kommýnıkatsııalar qyzmetinde ótken baspasóz máslıhatynda sý tasqyny Qazaqstannyń klımatynda jyl saıyn qaıtalana beretinin aıtty.

- Qazaqstanda tasqyn bolmaı, sýarý maýsymynda sý jetkilikti bolý úshin neshe qoıma salý kerek. Ol qoımalar qashan paıda bolady, - dep surady jýrnalıst.

Vıtse-mınıstrdiń aıtýynsha, bul turǵyda mınıstrliktiń jospary aıqyn.

- Bizde tasqyn kezeńi jyl saıyn qaıtalanyp otyrady. Óıtkeni bul ózenderdiń gıdrologııalyq tsıkline baılanysty jáne jalpy klımat solaı qalyptasqan. Sondyqtan jyl saıyn tasqyn jaǵdaılary bolyp jatady. Árıne, tasqynǵa erte bastan daıyndalamyz. 

Bul jerde tasqynnyń sýyn jınaqtaý da mańyzdy. Qazir keıbir óńirlerde sý qoımalary «jınaqtaý» rejıminde jumys istep tur. Al tasqyn qaýpi bar ýchaskelerde sý deńgeıin qoldan rettep otyrmyz. 

Qazir elimizde 405-ke jýyq sý qoımasy jumys istep tur. 2030 jylǵa deıin taǵy 42 jańa sý qoımasyn salýdy josparlap otyrmyz. Olar birinshi kezekte tasqyn sýdy jınaqtap, tıimdi jaratýǵa baǵyttalady. Árıne, qoımalar ózen arnalaryn tıimdi retteý arqyly tasqyn saldaryn boldyrmaýǵa múmkindik beredi, - dedi ol.

Vıtse-mınıstrdiń sózine qaraǵanda qazir halyq ásirese shaǵyn ózenderden kóp zardap shegip otyr.

- Qazir eldegi sý qoımalarynyń sany jetkiliksiz dep aıtýǵa bolady. Qazir jumys istep turǵan 405 sý qoımasy shamamen 80 mlrd tekshe metr sý jınaqtaı alady. Qazirgi jaǵdaıda olardyń syıymdylyǵy jetkilikti. Al men aıtyp otyrǵan 42 qoıma qysqa merzimdi tasqyn sýdyń negizgi bóligi keletin shaǵyn ózenderdiń boıyna salynady. Osy turǵydan alǵanda jańa sý qoımalaryna qajettilik bar, - dedi Nurlan Aldamjarov. 

Buǵan deıin vedomstvo Qazaqstan kórshi eldermen tasqyn qaýpi týraly qalaı málimet almasatynyn túsindirgen bolatyn.