Qazaqstanda tarıhı nysandarǵa saparlaýǵa áýe kóligin keńinen paıdalaný kerek

 Bul týraly búgin «G-Global» Halyqaralyq hatshylyǵy basshysynyń orynbasary Saltanat Rahymbekova málim etti.

«Búginde týrıstik tarıhı nysandarǵa qaraı baratyn joldardy birden salý múmkin emes. Alaıda, sheteldik týrısterdiń qyzyǵýshylyǵyn týdyryp otyrǵan nysandarǵa áýe kóligi arqyly jetýge bolady. Osy oraıda elimizde tikushaq jáne shaǵyn ushaqtardyń parki men olardyń baǵdarlaryn keńinen damytý qajet bolyp tur. Shalǵaıdaǵy tarıhı nysandarǵa avtokólikpen jetý uzaqqa sozylatyn bolsa, al áýe kóligimen jetý kóp ýaqyt almaıdy»,-dedi S. Rahymbekova Ortalyq kommýnıkatsııalar qyzmetindegi baspasóz máslıhatynda.

Onyń sózine qaraǵanda, bul máselelerdiń sheshimin tabý úshin týrıstik ındýstrııanyń ókilderimen tyǵyz pikir almasý qajet.

«Osy rette aı saıyn oblystarmen «dóńgelek ústelder» men konferentsııalar ótkizýdi josparlap otyrmyz. Jergilikti jerlermen tyǵyz qarym-qatynas ornatyp, týrızm baǵdarlaryn damytýda belsendi is-qımyldar jasaýǵa tyrysamyz»,-dedi ol.

Budan buryn habarlanǵandaı, Ortalyq kommýnıkatsııalar qyzmetinde týrıstik saladaǵy «Keń Dala» ulttyq syılyǵy baıqaýy jarııalandy.

Atap aıtqanda, baıqaýdy elimizdiń týrıstik naryǵynyń kóshbasshylaryn biriktirgen Qazaqstannyń týrındýstrııa ulttyq odaǵy uıymdastyryp otyr.

Atalǵan odaqtyń atqarýshy dırektory Gaýhar Jeńisbektiń sózine qaraǵanda, bul syılyq týrızmniń damýyn yntalandyrýǵa, jaqsy kompanııalardy anyqtaýǵa jáne tanymal baǵdarlar trendin jasaýǵa baǵyttalǵan. «Ulttyq syılyq týrızm ındýstrııasyn damytýǵa eleýli úles qosqany úshin salalyq júlde retinde taǵaıyndaldy. Baıqaý 12 atalymdy qamtyp otyr»,-dedi G. Jeńisbek.

Atalymdar arasynda oqıǵalyq týrızmniń eń jaqsy jobasy; úzdik ulttyq týrıstik kompanııa; úzdik aımaqtyq týrıstik kompanııa; úzdik gıd-saıahat júrgizýshi; úzdik shıpajaı; qonaq úı ındýstrııasynyń úzdik nysany; úzdik  balalar demalysy baǵyttary qamtylǵan.