Qazaqstanda tarıhı-mádenı mura nysandarymen jumys tártibi bekitildi
ASTANA. KAZINFORM — Qazaqstanda tarıhı-mádenı mura obektilerin qorǵaý jáne paıdalaný jónindegi uıymdardyń qyzmet qaǵıdalary bekitildi. Tıisti buıryqqa Qazaqstan Respýblıkasy Mádenıet jáne aqparat mınıstrligi basshylyǵy qol qoıǵan.
Qujatqa sáıkes, mundaı uıymdar jergilikti atqarýshy organdardyń sheshimimen qurylyp, kommýnaldyq memlekettik mekeme nysanynda jumys isteıdi.
Uıymdardyń negizgi mindetterine óńirdegi tarıhı-mádenı mura nysandaryn qorǵaý jáne saqtaý, ǵylymı-zertteý, esepke alý jáne monıtorıng jumystaryn júrgizý, sondaı-aq olardy tıimdi paıdalaný boıynsha sharalardy ázirleý jáne iske asyrý kiredi. Sonymen qatar tarıhı-mádenı mura máseleleri jónindegi arnaıy komıssııa qurý jáne jańa monýmentaldy óner nysandaryn aıqyndaý boıynsha qujattar ázirleý qarastyrylǵan.
Uıymdar ýákiletti organ bekitken josparlarǵa sáıkes arheologııalyq jáne qutqarý-qorǵaý jumystaryn júrgizedi.
Negizgi baǵyttardyń qatarynda eseptik jáne ǵylymı qujattamany júrgizý (esep kartochkalary, pasporttar, qorǵaý aımaqtarynyń materıaldary), eskertkishterdiń tehnıkalyq jaı-kúıin jyl saıyn tekserý, sondaı-aq olardy jergilikti jáne respýblıkalyq mańyzy bar memlekettik tizimderge engizý boıynsha usynystar daıyndaý bar.
Sondaı-aq uıymdar qorǵaý aımaqtaryn belgileý, aýmaqtardy paıdalaný rejımderin ázirleý, qorǵaý sharttaryn jasaý, kórmeler, dárister men ekskýrsııalar uıymdastyrý, ǵylymı, bilim berý jáne halyqaralyq uıymdarmen ózara is-qımyl jasaý jumystarymen aınalysady.
Qujat 2026 jylǵy 4 mamyrdan bastap kúshine enedi.
Buǵan deıin Syr óńirindegi Bábish mola, Jankent, Syǵanaq qalashyqtaryna qazba jumysy júrgiziletini habarlanǵan bolatyn.
Eske salaıyq, Mádenıet mınıstrligi tarıhı-mádenı saraptama júrgizý qaǵıdalaryna ózgerister engizý týraly buıryq jobasyn qoǵamdyq talqylaýǵa shyǵarǵan edi.
Qazaqstan men Ulybrıtanııa ǵalymdary qola dáýirindegi tehnologııalyq jańashyldyqtardy zertteıdi.
