Qazaqstanda tarıhı geologııalyq derekterdiń 97,5%-y tsıfrlandyryldy
ASTANA. KAZINFORM – Qazaqstanda kóp jyldan beri qaǵaz kúıinde saqtalǵan geologııalyq qujattardy tsıfrlandyrý jumysy aıaqtalýǵa jaqyn. Qazir tarıhı derekterdiń 97,5%-y skanerlengen. Bul shamamen 4,7 mln karta men esepti qamtıdy. Bul týraly OKQ alańynda ótken brıfıngte QR Ónerkásip jáne qurylys vıtse-mınıstri Jánnat Dúbirova aıtty.
Onyń aıtýynsha, tsıfrlandyrý jumysy jasandy ıntellekt tehnologııalaryn engizýge negiz bolyp otyr. Qazir mınıstrlikte biryńǵaı geoderekter bazasy qalyptasyp jatyr. Sonymen qatar kólemi shamamen 1 terabaıt bolatyn alǵashqy aqparat júktelgen júıeniń synaq nusqasy ázirlengen.
— Bul júıe mamandarǵa barlyq aqparatty bir jerden qarap, qajetti málimetti tez tabýǵa múmkindik beredi. Sonyń arqasynda derekterdi salystyrý men bastapqy taldaý júrgizý jeńildeıdi, — dedi vıtse-mınıstr.
Sondaı-aq geologtyń jeke kabıneti men ınteraktıvti karta ázirlengen. Vıtse-mınıstrdiń sózinshe, bul paıdaly qazbalardy izdeý jumysyn jedeldetýge kómektesedi.
Sonymen birge ol sońǵy sheshimdi mamandar qabyldaıtyny atap ótti.
Aıta keteıik, buǵan deıin Qazaqstanda jasandy ıntellekt pen tsıfrlandyrýdy damytýǵa 177 mlrd teńge bólingeni habarlanǵan edi.
