Qazaqstanda tarıfti retteý salasynda jańadan eki jańa ınstıtýt qurylady

ASTANA. QazAqparat - QR Ulttyq ekonomıka mınıstrliginiń «Tabıǵı monopolııalar týraly» zań jobasy negizinde tarıftik saıasatqa birshama ózgerister engizgeli jatyr. Zań jobasynyń maqsaty týraly Májiliste «Tabıǵı monopolııalar týraly zańnamany jáne tarıf belgileýdi jetildirý» taqyrybynda ótken dóńgelek ústelde QR UEM vıtse-mınıstri Serik Jumanǵarın aıtyp berdi, dep habarlaıdy QazAqparat tilshisi.

Tarıftik retteýdegi jańa tásilder týraly baıandama jasaǵan vıtse-mınıstr dóńgelek ústel bastalmaı turyp tilshilerge engizilgeli jatqan ózgerister týraly aıtty. Onyń sózine sáıkes, atalmysh saladaǵy ınfraqurylym jyl saıyn 70, tipti alys aımaqtarda 100 paıyzǵa deıin eskirip barady. 2014 jyly osy sebepti sońǵy tarıfter júıesi engizilip, ınvestıtsııalyq baǵdarlama ázirleý mindettelgen.

«TÚKSh salasynda tutynýshylar tarapynan birqatar shaǵymdar bizge túsken bolatyn. Sol sebepti, máseleni retteýde jańa tásilderdiń kerektigi aıqyn baıqaldy. Alaıda ınfraqurylymnyń túzelýimen biz qyzmet sapasy asa jaqsara qoımaıtynyn baqylap otyrmyz. Tarıftik retteýdegi jańa saıasat tabıǵı monopolııa sýbektterine ınvestıtsııalyq baǵdarlamalardy ázirleýdi mindettep qana qoımaıdy. Sýbekt óziniń qyzmetiniń sapa turǵysyndaǵy kórsetkishin, senimdiligin, jumysynyń tıimdiligin rastaı bilýi kerek. Biz oǵan qalaı baqylaý jasaýdy bilemiz. Bul jańa ádis - yntalandyrýshy ádis dep atalady», - deıdi Serik Jumanǵarın tilshilerge.

Demek, tabıǵı monopolııanyń sýbektisi bekitilgen baǵdarlamany oryndamasa, tutynýshylarǵa tarıfter qaıtarylyp beriledi.

«Biraq eń bastysy biz qyzmet sapasyna basa mańyz beremiz. Monopolıst ótinim berip, óziniń ınvest baǵdarlamasyn ázirleıdi de, qyzmetiniń sapasyn, senimdiligin, ınvestıtsııalyq tartymdylyǵyn dáleldeıdi. Eger ol osy talaptardy oryndamaıtyn bolsa, biz olardy tarıfterden aıyramyz. Tekserý jumystary jylyna bir ret júrgiziledi. Sondaı-aq, bul zańda eki jańa ınstıtýt qurylady. Birinshisi - tarıftik saıasat boıynsha qoǵamdyq keńes. Onyń quramyna depýtattar kiredi. Ekinshisi - tabıǵı monopolııalar salasyndaǵy tutynýshylardyń quqyǵyn qorǵaý qoǵamy. Biz bul salany tolyǵymen ashyq etkimiz keledi. Ásirese, monopolısterge qanshalyqty tarıfterdiń beriletinin báriniń bilgenin qalaımyz», - deıdi ol.

Vıtse-mınıstrdiń aıtýynsha, qoǵamdyq keńester tarıfterdi belgileý protsesine qatysyp, ótinimderdi qaraıtyn bolady.