Qazaqstanda tarıfterdi bekitýdi retteıtin organ quryla ma - vıtse-premer jaýaby
NUR-SULTAN. QazAqparat – Turǵyn úı-kommýnaldyq sharýashylyq tarıfterin bekitý boıynsha retteýshi qyzmeti júkteletin biryńǵaı organ qurýdyń ýaqyty kelgen joq. Bul týraly Májilis depýtattarynyń saýalyna QR Premer-Mınıstriniń orynbasary Roman Sklıardyń jaýabynda aıtylǵan, dep habarlaıdy QazAqparat tilshisi.
«2007 jyldyń 30 qarashasynda Úkimettiń №1153 qaýlysymen táýelsiz salalyq retteýshiler qurý tujyrymdamasy qabyldanǵannan keıin tarıftik jáne tehnıkalyq retteý qyzmetterin biriktiretin táýelsiz salalyq retteýshiler qurý jumysy júrgizildi. Atalǵan jumys básekelestikti damytýǵa, tarıf qalyptastyrýdyń teńgerimdi júıelerin qurýǵa, salanyń ınvestıtsııalyq tartymdylyǵyn arttyrýǵa, negizgi qorlardy jańǵyrtýǵa baǵyttalǵan. Osylaısha, biryńǵaı tarıftik retteýshini qurý ýaqyty kelgen joq», - dedi Roman Sklıar.
Aıta keterligi, Májilis depýtattarynyń saýalynda Energetıka jáne Ulttyq ekonomıka mınıstrlikteriniń birqatar qyzmetterin biriktiretin biryńǵaı organ qurý, oǵan turǵyn úı-kommýnaldyq sharýashylyq tarıfterin bekitý boıynsha retteýshi qyzmetin berý máselesi kóterilgen bolatyn. Sondaı-aq depýtattar jańadan qurylatyn organdy Prezıdent baqylaýyna berýdi de usynǵan edi.
