Qazaqstanda taralatyn aqparattyq materıaldardy terrorıstik dep taný týraly sheshim dereý oryndaýǵa jatatyn bolady
ASTANA. QazAqparat - Búgin Májilistiń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine ekstremızmge jáne terrorızmge qarsy is-qımyl máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.
«Zań jobasy boıynsha erekshe óndiristik negizde ekstremıstik nemese terrorıstik uıymdardy «sheteldik» nemese «halyqaralyq» degen sózderdi alyp tastaı otyryp, olardyń áreket etetin aýmaǵyna qaramastan taný sheshimi qabyldanady. Óıtkeni, búgingi kúni Qazaqstanda tirkelgen uıymdardy terrorıstik dep taný tek erekshe shaǵymdyq jaǵdaıda ǵana júzege asady. Álbette, bul osyndaı uıymdarǵa qatysty sanattaǵy isterdiń sottarda qaralý merzimine áser etedi ári olardyń áreketteriniń aldyn alýǵa teris áser etedi», - deıdi QR Bas prokýrorynyń orynbasary Andreı Kravchenko. Onyń aıtýynsha, osyndaı ister boıynsha sot sheshimderin jedel oryndaý sanatyna jatqyzý qarastyrylyp otyr.
Budan bólek, zań jobasymen Qazaqstan aýmaǵynda taralatyn aqparattyq materıaldardy ekstremıstik nemese terrorıstik dep taný týraly sheshimderdi dereý oryndalýǵa tıisti sheshimderdiń qataryna jatqyzý usynylady.
Jalpy, zań jobasynyń negizgi maqsaty - ekstremızm men terrorızmge qarsy is-qımyl salasyndaǵy qatynastardy retteıtin zańnamany jetildirý. Zań jobasynda Azamattyq is júrgizý jáne Jer kodeksterine, sondaı-aq QR birqatar zańdaryna ózgerister men tolyqtyrýlar engizedi.
Máselen, Jer kodeksine jer ýchaskelerin berý protsesin retteý, sondaı-aq QR Dinı qyzmet jáne dinı birlestikter týraly zańnamasyna sáıkes ǵıbadat úıin (ǵımarattaryn) salý nemese ǵımarattardy ǵıbadat úıine qaıta beıindeý úshin jer ýchaskeleriniń nysanaly maqsatyn ózgertý boıynsha túzetýler engizildi.
