Qazaqstanda tapsyrylatyn joldardyń sapasyna aýdıt júrgizý kerek - Nurtaı Sabılıanov
ASTANA. QazAqparat - Parlament Májilisindegi Úkimet saǵatynda depýtat Nurtaı Sabılıanov avtokólik joldarynyń sapasyna aýdıt júrgizý máselesin kóterdi, dep habarlaıdy QazAqparat.
«Avtomobıl joldaryna jóndeý jumystary júrgizilip, rekonstrýktsııalanǵannan keıin olardyń kóp uzamaı búlinetin jaǵdaılary da jıi kezdesedi. Osyǵan baılanysty mınıstrlik pen quqyq qorǵaý organdary jurtshylyqty, táýelsiz sarapshylardy tarta otyryp, paıdalanýǵa beriletin avtomobıl joldarynyń sapasy boıynsha aýdıt pen revızııa júrgizý qajet. «QazAvtoJol» ulttyq kompanııasy kelisimsharttyq mindettemelerin adal oryndaıtyn kompanııalarmen jumys isteýi tıis»,-dep toqtaldy depýtat.
Onyń sózine qaraǵanda, 2016 jyly «QazAvtoJol» ulttyq kompanııasy taýarlardy, jumystardy jáne kórsetilgen qyzmetterdi satyp alýǵa baılanysty 21 talap-aryzben sotqa júgindi. Alaıda daýlar tek josyqsyz merdigerlerdiń kinásinen ǵana emes, sonymen qatar «QazAvtoJoldyń» satyp alý júrgizý kezindegi áreketterine baılanysty da týyndap jatady.
«Sondyqtan da, kvazımemlekettik sektor sýbektileriniń, onyń ishinde «QazAvtoJol» ulttyq kompanııasy AQ-nyń satyp alýdy júrgizýin retteıtin jáne laýazymdy tulǵalardyń jaýapkershiligin, qyzmetiniń ashyqtyǵyn qamtamasyz etetin «Satyp alý týraly» jańa Zańdy qabyldaıtyn ýaqyt keldi», - dep túıindedi sózin N. Sabılıanov.
