Qazaqstanda tapshy mamandyqtardy anyqtaý maqsatynda Bilim mınıstrligi eńbek naryǵyn zertteýde
ASTANA. 4 qarasha. QazAqparat - Eńbek naryǵyn qajetti mamandarmen qamtý úshin barlyq múddeli memlekettik organdar talapkerlerge kásibı baǵdar berý jumystarymen aınalysýy qajet.
Bul týraly búgin Astanada ótken «Mamandardy kooperatıvti daıyndaý - elordanyń turaqty ekonomıkalyq damýynyń negizi» atty qalalyq forýmda Bilim berý basqarmasynyń basshysy Ásıma Bımendına málim etti.
«Astanadaǵy kolledjderde 29 myńnan astam stýdent bilim alýda. Tehnıkalyq mamandyqtar boıynsha jumyspen qamtý 100 paıyzǵa taıaý bolyp otyr. Búgingi tańda tehnıkalyq mamandyqtarǵa talapkerler az qyzyǵýshylyq tanytady. Kerisinshe surynysy joq gýmanıtarlyq mamandardyń sany artýda. Osyǵan baılanysty barlyq múddeli memlekettik organdar kásibı baǵdar berý jumystarymen aınalysýy qajet», - dedi A.Bımendına.
Onyń aıtýynsha, Qazaqstanda tapshy mamandyqtardy anyqtaý maqsatynda Bilim mınıstrligi elimizdiń eńbek naryǵyn zertteýde. «Kolledjder sol saraptanyń negizinde Astanada qansha jańa kásiporyn ashylatynyn, oǵan qansha jáne qandaı mamandar qajet ekendigin biledi. Sondyqtan olar bizde tapshy bolyp otyrǵan mamandyqtar boıynsha bilim berýde. Osy oraıda memlekettik bilim berý tapsyrysy negizinen tehnıkalyq mamandyqtarǵa basymdyq baǵyttalǵan. 2013 jyly memlekettik tapsyrys sany 6 paıyzǵa artyp otyr», - dep atap kórsetti basqarma basshysy.
Búgingi forýmnyń maqsaty - qalamyzdyń eńbek naryǵyna qajetti mamandardy daıarlaýǵa jumys berýshilerdi tartý, jastardyń jumysbastylyǵyn qamtamasyz etetin sharalardy belgileý. Shara barysynda ákimshilik, salalyq qaýymdastyqtar, iri kompanııalar jáne oqý oryndarynyń arasynda 200-den astam memorandýmǵa, 300-den astam kelisimge qol qoıylmaq. Onyń aıasynda jastar elordadaǵy kásiporyndarda tájirıbeden ótýge jáne jumysqa ornalasýǵa múmkindik alatyn bolady.
