Qazaqstanda tańbalanǵan taýarlardy satý úshin saýda oryndary 2D skanerlerimen jabdyqtalýda
NUR-SULTAN. QazAqparat – «Qazaqtelekom» AQ Basqarma tóraǵasy Qýanyshbek Esekeev Úkimetke taýarlardy tańbalaý jáne qadaǵalaý salasyndaǵy kompanııanyń atqarǵan jumysy týraly baıan etti, dep habarlaıdy QazAqparat tilshisi.
Aıta keterligi, 2020 jyldyń 1 qazanynan bastap Qazaqstanda temeki ónimderin mindetti tańbalaý talaby qoıyldy. Onyń tehnıkalyq quramyna jaýapty, derekterdi saqtaý jáne naryq qatysýshylarynyń aqparattyq júıelerin úılestirýge mindetti etip, ári júıeniń biryńǵaı operatory retinde - «Qazaqtelekom» bekitilgen. Osy ýaqytqa deıin operatordyń aqparattyq júıesinde aınalymǵa qatysýshylardyń 1000-ǵa jýyǵy tirkelip, 321 mln Data Matrix kodtary shyǵarylǵan, olardyń 176 mıllıony temeki qoraptaryna engizilgen. Búgingi kúni elde tek tańbalanǵan temeki shyǵarylady. Al tańbalanbaǵan qaldyqtar qaıta tańbalaýǵa jatpaıdy, alaıda olardy satý 12 aı ishinde, ıaǵnı 2021 jyldyń 1 qazanyna deıin júzege asyrylady.
«Búgingi kúni biryńǵaı operator retinde tańbalanǵan taýarlardyń satylýyn qamtamasyz etý úshin saýda oryndaryn 2D skanerlerimen jabdyqtaý boıynsha usynystar túsip jatyr. 2020 jyldyń 1 qańtarynan bastap 34 myńnan astam skaner satyldy. Osynyń nátıjesinde temeki ónimderi satylatyn 80 myń bólshek saýda oryndarynyń 42% -y nemese 33,5 myńnan astam saýda oryndary tańbaly temekiniń aınalymyna daıyn», - dep atap ótti «Qazaqtelekom» AQ basqarma tóraǵasy Qýanyshbek Esekeev Úkimet otyrysynda.
Sondaı-aq, kompanııa 2D skaner satyp alý múmkindigi joq naryq qatysýshylaryna arnalǵan Naqty Sauda tegin mobıldi qosymshasyn ázirlep jatyr. Bul qosymshany smartfonǵa júktep alýǵa bolady.
