Qazaqstanda tamyzdyń 1-nen bastap elektr energııasyn berýge biryńǵaı tarıfter engiziledi - QR TMRA
ASTANA. Shildeniń 26-sy. QazAqparat /Jasulan Amanbaıuly/ - 2010 jyly tamyzdyń 1-nen bastap «KEGOK» AQ jelileri arqyly elektr energııasyn berý jónindegi qyzmetterge biryńǵaı tarıfter engiziledi.
Osyǵan oraı, eldiń birqatar aımaqtarynda elektr energııasynyń baǵasy tómendeıdi. Bul týraly búgin brıfıng barysynda jýrnalısterge QR Tabıǵı monopolııalardy retteý agenttigi tóraǵasynyń orynbasary Anatolıı Shkarýpa málim etti.
Onyń aıtýynsha, biryńǵaı tarıfterdi engizýdiń esebinen Almaty qalasynda, Almaty men Qostanaı oblystarynda elektr energııasyna salynatyn tarıfter deńgeıin tómendetýge múmkindik týdy. «KEGOK» arqyly elektr energııasyn berý tarıfi 0,94 teńge/kVt. saǵat kóleminde dep bekitilgen.
Osylaısha, elimizde elektr energııasy tarıfteri eń joǵary aımaqtardaǵy elektr energııasynyń baǵasy 0,6 paıyzdan 3,2 paıyzǵa deıin arzandaıdy.
Atap aıtqanda, Almaty qalasynda jáne Almaty oblysynda («Almatyenergosbyt» JShS-niń qyzmet kórsetý aımaǵy) ortasha tarıfterdiń deńgeıi 10,1 teńge/kVt.saǵat nemese 0,6 paıyzǵa tómendetildi. Osyǵan sáıkes, tutyný kólemderi boıynsha saralanǵan tarıfterdiń deńgeıi de ózgerdi. Tutynýshylar elektr energııasyn belgilengen shekterde paıdalansa, 1 kVt.saǵat toq úshin 10,54 teńge (QQS sanaǵanda), belgilengen shamadan tys tutynǵan energııasy úshin 13,57 teńge (QQS sanaǵanda) tóleıtin bolady.
«Almaty qalasynda aımaqtyq tarıfter deńgeıi 0,6 paıyzǵa tómendetildi. Olardyń deńgeıi tamyzdyń 1-nen bastap, jeke tulǵalar úshin: kúndizgi tarıf 14,53 teńge/kVt.saǵat, túngi tarıf 3,21 teńge/kVt.saǵat shamasynda. Zańdy tulǵalar úshin kúndizgi tarıf 11,31 teńge, eń joǵary júktelim ýaqyttaryndaǵy (19.00-den 23.00-ge deıin) energııa baǵamy 23,45 teńge/kVt.saǵat bolmaq. Al túngi tarıf kólemi 3,21 teńge deńgeıinde turaqtalady», deıdi A.Shkarýpa.
Almaty oblysynda elektr energııasynyń tarıfteri orta eseppen 0,17 teńgege nemese 1,6 paıyzǵa arzandaıdy. Onyń baǵamy 10,75 teńge/kVt.saǵat bolyp bekitildi. Al Qostanaı oblysyndaǵy elektr energııasy ortasha eseppen 2,6 paıyzǵa tómendetiledi. Sonymen qatar oblysqa qarasty Lısakov (3,4 %), Rýdnyı (2,8 %), Jetiqara (3,2 %) qalalaryndaǵy jetkizilim tarıfteri áldeneshe paıyzǵa arzan bolady.
