Qazaqstanda tamyz aıynda 159 myńnan astam avtokólik tirkeldi

ASTANA. KAZINFORM — Bıylǵy tamyz aıynda Qazaqstanda 159,5 myń avtokólik quraly tirkeldi. Olardyń 15,2 paıyzy alǵash ret esepke qoıylǵan, dep habarlaıdy Ulttyq statıstıka bıýrosy.

Eń kóp tirkeý Almaty qalasynda (20,7 myń birlik), Almaty oblysynda (15,6 myń birlik) jáne Astana qalasynda (14,5 myń birlik) boldy.

Statıstıkaǵa sáıkes, tamyz aıynda esepke qoıylǵan kólikterdiń 59,7 paıyzynyń jasy 10 jyldan asqan. Qozǵaltqysh kólemi boıynsha basym bóligi (36,3 paıyzy) 1 500-2 000 sm³ aralyǵynda.

2025 jylǵy 1 qyrkúıektegi jaǵdaı boıynsha eldegi tirkelgen avtokólik parki 6 786,9 myń birlikti qurady. Bul kórsetkish bir jyl ishinde 21,6 paıyzǵa ósken.

Avtokólikterdiń eń kóp shoǵyrlanǵan óńirleri Almaty qalasy (797,2 myń birlik) jáne Almaty oblysy (723,9 myń birlik) bolyp otyr.

Sondaı-aq tirkelgen kólikterdiń 91,9 paıyzy jeke tulǵalardyń ıeliginde, qalǵan bóligi zańdy tulǵalardyń atyna rásimdelgen.

Aıta keteıik, qytaılar kólik ornyna velosıped minip, kúnine 6,6 mln lıtr benzın únemdep otyr.