Qazaqstanda tamaq jetkizý qyzmetine qoıylatyn jańa talaptar bekitildi
ASTANA. KAZINFORM – QR SIM Tehnıkalyq retteý jáne metrologııa komıteti QR ST 3988-2024 «Qoǵamdyq tamaqtaný qyzmetteri. Tutynýshylardyń tapsyrysy boıynsha qoǵamdyq tamaqtandyrý ónimderin jetkizý. Jalpy talaptar» qujatyn bekitti.
Qujat 2025 jyldyń 1 qańtarynan bastap qoldanysqa engizildi.
Standartty QR SIM Saýda komıtetiniń bastamasy boıynsha Qazaqstan standarttaý jáne metrologııa ınstıtýty ázirledi.
- Osy standartty qoldanýdan qoǵamdyq tamaqtandyrý ónimderin jetkizý naryǵyndaǵy talaptardyń ashyqtyǵy men birizdiligi qamtamasyz etiledi.Tutynýshylardyń kórsetiletin qyzmetterge degen senim deńgeıi artady jáne Qazaqstan Respýblıkasynda azyq-túlik qaýipsizdigi júıesiniń nyǵaıýyna yqpal etedi, - dep atap ótti Tehnıkalyq retteý jáne metrologııa komıtetiniń tóraǵasy Janna Esenbekova.
Mysaly, standartqa sáıkes kýrerlerde medıtsınalyq tekserýden ótkeni týraly belgisi bar belgilengen úlgidegi jeke medıtsınalyq kitapsha bolýǵa tıis jáne olar kásibı gıgıenalyq daıyndyqtan ótýge, sondaı-aq jalpy qabyldanǵan normalar men minez-qulyq erejelerin basshylyqqa alýǵa tıis.
Budan basqa, qoǵamdyq tamaqtandyrý ónimderin tapsyrysta kórsetilgen oryn boıynsha tutynýshylarǵa jetkizý kezinde jáne tapsyrystardy berý pýnktterinde qaptamanyń tasymaldaý barysynda syrtqy zaqymdanýyn anyqtaý úshin tapsyrystaǵy ónimdi tekserý múmkindigi berilýge tıis.
Qabyldanǵan standart meıramhanalardyń, kafelerdiń, logıstıkalyq kompanııalardyń jáne kýrerlerdiń tamaq jetkizý qyzmetiniń sapasyn arttyrýǵa arnalǵan.
Buǵan deıin óńirlik kommýnıkatsııalar qyzmetinde ótken baspasóz máslıhatynda almatylyq epıdemıolog tamaqtan ýlanbaýdyń qarapaıym erejelerin túsindirip bergen edi.