Qazaqstanda tamaq ónerkásibi mamandarynyń tapshylyǵy máselesin oqý-ádistemelik klaster sheshedi

ALMATY. QazAqparat - Almatyda tamaq ónerkásibi mamandaryn daıarlaýǵa arnalǵan oqý-ádistemelik klaster ashyldy. Ashylý saltanatyna qalalyq kásipkerler palatasy, bilim basqarmasy, Qazaqstannyń tamaq ónerkásibi kásiporyndarynyń Odaǵy ókilderi qatysty.

Atalǵan másele maýsym aıynda ótken Almaty qalalyq kásipkerleriniń birinshi konferentsııasynda aıtylǵan edi. Qalalyq kásipkerler palatasynyń tóraǵasy Erlan Stambekov Ulttyq kásipkerler palatasyna ekonomıkanyń ár salasy boıynsha 6 salalyq oqý-ádistemelik klasterin ashý týraly usynys kótergen bolatyn.

Atap aıtqanda, jeńil ónerkásip, týrızm ındýstrııasy, polıgrafııa men baspa, jıhaz jáne aǵash óńdeý, tamaq jáne óńdeý ónerkásibi, qurylys salasy óndirisi men kásiptik bilim berý oryndary arasynda baılanys ornatý qajettigi aıtylǵan bolatyn.

Búgingi ashylǵan tamaq ónerkásibi mamandaryn daıarlaýǵa arnalǵan oqý-ádistemelik klaster - qalalyq kásipkerler palatasynyń júzege asyrǵan alǵashqy qadamy.

Sondaı-aq, dóńgelek ústelde eldegi tamaq ónerkásibine qajetti mamandardyń tapshylyǵy máselesi talqylandy.

QR Eńbek jáne áleýmettik qorǵaý mınıstrliginiń deregine sáıkes, 2014 jylǵy Qazaqstan ekonomıkasy 287 myń mamanǵa muqtaj, olardyń ishinde 106 myń maman Údemeli ındýstrıaldyq-ınnovatsııalyq baǵdarlamany júzege asyrýǵa qajet.

Atalǵan másele elimizi EAEO-ǵa kirgen kezde odan ári ýshyǵa túsedi, deıdi mamandar.

«2015 jyldyń 1 qańtarynan bastap EAEO qurý týraly kelisim óz kúshine enedi. Onda jumys kúshiniń erkin qozǵalysy kórsetilgen. Bizdiń azamattar Belarýs, Reseı elderine kedergisiz ene alady. Bul tamaq óndiris kásiporyndary úshin mamandar tapshylyǵy máselesin odan ári ýshyqtyrýy múmkin. Óıtkeni, shekaralyq oblystarda ornalasqan kásiporyndardan Reseıge ketip qalýy múmkin. Sondyqtan, jańadan oqý ornyn bitirgen mamandardy Qazaqstan kásiporyndarynda alyp qalý mańyzdy. Ol úshin túlekterdi belgili bir kásiporynǵa kelisimshartpen bekitý artyq bolmaıdy», - dedi Qazaqstannyń Tamaq ónerkásibi kásiporyndarynyń Odaǵynyń tóraǵasy Anatolıı Popelıýshko.

Klaster jumys berýshilerdiń talabynan shyǵatyn bilikti mamandardy daıarlaýdy jańa kezeńge shyǵarýǵa baǵyttalǵan. Oqý-ádistemelik klasterdi qurý bıznes pen bilim berý salasynyń arasyn jaqyndata túsedi.

Klasterdiń úılestirý ortalyǵy Almatydaǵy «Perspektıva» kolledji bolady. Onda «Rahat» fabrıkasyna arnap mamandar daıarlanyp jatyr.

«Munda stýdentter praktıkalyq turǵydan kóp bilim alatyn bolady. Tikeleı óndiriste júrgen soń olardyń biliktiligi de arta túsedi»,- dedi ol.