Qazaqstanda talapkerlerdi baǵalaýdyń jańa júıesi engiziledi
ASTANA. KAZINFORM — Qazaqstanda talapkerlerdi irikteý tásili ózgerip, jańa formattaǵy test engiziledi. Bul týraly Úkimet otyrysynan keıingi baspasóz máslıhatynda Saıasat Nurbek málim etti.
Baspasóz máslıhaty barysynda jýrnalıster joǵary oqý oryndaryndaǵy bilimniń formaldy sıpaty týraly synǵa qatysty suraq qoıdy.
Mınıstrdiń aıtýynsha, bul máseleni sheshý úshin talapkerlerdi irikteý júıesi jańartylyp jatyr.
— Ótken jyly Memleket basshysynyń sapary aıasynda AQSh-qa baryp, test ázirleý boıynsha álemdegi jetekshi ITS kompanııasymen kelisimge qol qoıdyq. Qazir jańa formattaǵy test ázirlenip jatyr, — dedi ol.
Onyń sózinshe, Admissions Insight Test dep atalatyn jańa test talapkerlerdi neǵurlym naqty irikteýge, olardyń bilimin jan-jaqty baǵalaýǵa jáne nátıjelerin tereńirek túsinýge múmkindik beredi.
— Burynǵydaı tek bir ǵana jalpy ball bolmaıdy. Nátıje birneshe modýl boıynsha kórsetiledi. Jobany kelesi jyly pılottyq rejımde iske qosýdy josparlap otyrmyz, — dedi mınıstr.
Saıasat Nurbek ózgerister kezeń-kezeńimen engiziletinin atap ótti.
— Eshqandaı kúrt ózgeris bolmaıdy. Talapkerler úshin tosyn nemese shuǵyl jańalyqtar bolmaıdy, — dedi ol.
Aıta keteıik, buǵan deıin Úkimet otyrysynda ǵylymı jetistikter kórsetkishin óńir ákimderiniń reıtıngine qosý qajettigi aıtylǵan edi.
