Qazaqstanda talantty balalardy tartý úshin óńirlik fýtbol akademııalaryn qurý josparda bar - E.Qojaǵapanov
ASTANA. QazAqparat - Qazaqstan Fýtbol federatsııasynyń prezıdenti Erlan Qojaǵapanov Taraz qalasynda Jambyl oblysynyń fýtbol súıer qaýymymen kezdesip, onda osy sport túriniń keleshek máseleleri talqylandy. Shaqyrylǵandar qatarynda kezindegi elimizdiń ataqty fýtbolshylary Seıildá Baıshaqov, Núrken Mazbaev, Farhad Mırsalımbaev, Vıacheslav Hvan, Hrıstofor Kaskenıdı jáne de jattyqtyrýshalyr, fýtbol jankúıerleri boldy. Bul týraly federatsııanyń baspasóz qyzmetinen habarlady.
Kezdesý barysynda federatsııa basshysy qazaqstandyq fýtboldy damytýdyń 2022 jylǵa deıingi baǵdarlama jobasyn tanystyrdy. Atalǵan baǵdarlamanyń basym baǵyttarynyń biri - Qazaqstandaǵy jasóspirimder men balalar fýtbolyn damytý.
«Qazaqstan dop tebetin talantty balalardan kende emes. Bizdiń mindetimiz - osy talanttardy tasada qaldyrmaı tabý, olarǵa oqýlaryna jaǵdaı jasaý. Olar erteńgi kúni eýropalyq arenalarda ózderin kórsetip, ulttyq quramany da alǵa jeteleýleri kerek», - dedi Erlan Qojaǵapanov.
Budan bólek, Fýtbol federatsııasynyń prezıdenti ardagerlermen, jattyqtyrýshylarmen qazaqstandyq fýtboldyń basqa da máselelerin talqyǵa saldy. Kópshiliktiń pikiri boıynsha búgingi tańda elimizde sport ınfraqurylymyn damytý men balalar jattyqtyrýshylarynyń ımıdjin arttyrý - ózekti másele.
«Qazaqstannyń klımattyq erekshelikterin eskere otyryp, bizge jabyq alańdardy kóbirek salý kerek, onda fýtbolshylar jyl boıy jattyǵýlary tıis. Budan bólek, balalar jattyqtyrýshylarynyń sanyn eselep arttyryp, olardy jańa tehnologııalarmen oqytý da mańyzdy. Eger qazirgi kúni «S» sanatyndaǵy jattyqtyrýshylar sany 195 adam bolsa, aldaǵy 7 jylda biz olardy 10 esege arttyramyz. Bul asa mańyzdy mindet, óıtkeni fýtbolshylar negizgi bazalyq bilimdi jas kezinde alady», - dedi Erlan Qojaǵapanov.
