Qazaqstanda tal men kóshet baǵasy qansha
ASTANA. KAZINFORM – Elimizdiń óńirlerinde jemis aǵashtary men kókónis kóshetiniń baǵasy arasyndaǵy aıyrmashylyq rekordtyq kórsetkishke jetti. Baý-baqsha baptaıtyndar muny anyq sezineri sózsiz, dep habarlaıdy Kazinform agenttiginiń tilshisi.
Qazirgi kezde baý-baqsha maýsymy bastalyp jatyr. Soǵan saı jemis aǵashtary men túrli kókónis kóshetine suranys artary belgili. Óńirlerde baǵa ártúrli bolyp tur. Sonyń ishinde alma jáne qaraqat aǵashy men qyzanaq, burysh, baıaldy jáne qyryqqabat kóshitiniń baǵasyn bilip, salystyrdyq.
Jemis aǵashtarynyń baǵasy aıtaryqtaı joǵary. Eń arzany elimizdiń ońtústiginde satylyp jatyr. Máselen Shymkent qalasynda baǵa 300 teńgeden, al Taraz, Túrkistan men Qyzylordada 500 teńgeden bastalady. Aqtaý (800 teńgeden bastalady) men Aqtóbede de (1 000 teńgeden bastalady) baǵa ózge óńirlerge qaraǵanda qoljetimdi.
Ortasha kórsetkish Almaty (1800–9000 teńge), Qostanaı (1500–3000 teńge), Kókshetaý (2000–4000 teńge) jáne Atyraý (1500–5000 tenge) qalalarynda tirkeldi. Bul qalalardaǵy baǵa bir-birinen alshaq emes.
Baǵa elimizdiń soltústiginde, ortalyǵynda jáne shyǵysynda joǵary. Óskemen, Semeı men Jezqazǵanda jemis kóshetteriniń quny 12 myń teńgege deıin jetti. Bul elimiz boıynsha eń joǵary baǵa. Astana, Qaraǵandy men Oral qalalarynda kóp degende 10 myń teńge bolsa, Petropavlda eń arzany 3 500 teńgeden bastalyp, 10 myńǵa deıin jetedi.
Demek, eń arzany men eń qymbatyn salystyrǵanda baǵa arasyndaǵy aıyrmashylyq 40 ese bolyp tur. Jemis aǵashynyń qunyna klımattyq jaǵdaı, logıstıka shyǵyny men kóshetti baptaý qıyndyǵy áser etip tur. ıAǵnı baý-baqsha maýsymy kezinde jemis aǵashtaryn satyp alý qaltaǵa kúsh salady.
Al kókónis kóshetterine tańdaý kóp jáne baǵasy da áldeqaıda qoljetimdi. Eń arzany Taraz qalasynda satylyp jatyr. Munda ár kóshetti 25 teńgege satyp alýǵa bolady. Almaty qalasynda 50 teńgeden bastalsa, Shymkentte 80 teńge, Astanada 90 teńge jáne odan joǵary. Baǵa tómen, sebebi bul qalalarda jergilikti óndirýshiler bar.
Atyraý, Aqtaý, Aqtóbe, Túrkistan, Kókshetaý men Qyzylorda qalalarynda baǵa 100-300 teńge aralyǵynda. Al Qonaev qalasynda jáne Oralda 400 teńgege deıin jetedi.
Kókónis kóshetiniń baǵasy Qaraǵandy, Pavlodar, Óskemen, Semeı, Jezqazǵan men Taldyqorǵanda joǵary. Munda ár danasy 500 teńgeden bastalady. Qostanaı qalasynda baǵa 80 teńgeden bastalyp, keıbiri 500 teńgege jetedi. Baǵa kókónis surpy men ónim sapasyna qaraı ózgerip otyrady.
Naryqty saralaı kele, Qazaqstanda kókónis kóshetteriniń (qyzanaq, burysh, qyryqqabat) baǵasy orta eseppen 150-500 teńge aralyǵynda ekenin bildik. Elimizdiń ońtústik óńirleri, onyń ishinde Shymkent, Taraz, Túrkistan, Qyzylorda qalalarynda jemis aǵashtary men kókónis kóshetteriniń baǵasy tómen bolyp shyqty.
Al soltústik, ortalyq jáne shyǵysta, onyń ishinde Astana, Qaraǵandy, Pavlodar, Óskemen, Semeı qalalarynda baǵa joǵary.
Oǵan klımat, maýsymdyq suranys, jetkizýshi men jergilikti óndirýshiler tikeleı áser etedi. ıAǵnı baý-baqsha baptaıtyndarǵa óńirdiń qaıda ornalasqany tikeleı mańyzdy. Keıde baǵany salystyryp, shyǵyndy qysqartýǵa da bolatynyn umytpaǵan jón.
Buǵan deıin elimizdegi qııar men qyzanaq baǵasyn bildik.