Qazaqstanda taǵy úsh ózbekstandyq avtokólik shyǵarylady
ASTANA. QazAqparat - «AllurGroup» kompanııasy ózbekstandyq avtomobılderdiń óndiristik jelisin keńeıtedi, dep habarlaıdy QazAqparat tilshisi.
Kompanııa basshysynyń aıtýynsha, Ózbekstanmen birlesken kásiporyn kólikteri Qazaqstan naryǵynda úlken suranysqa ıe.
«Ótken jyly Ravon R3 modelin alǵash ret birlese shyǵardyq. Bul model satylymda kósh bastap tur, qańtar aıynda Qazaqstan naryǵynda eń kóp satylǵan avtokólik retinde tanyldy. Endi ózge de model túrlerimen jumys istep kórýge nıettimiz. Jyl sońyna deıin bul jumystardy bastap ketetin shyǵarmyz. Bıyl birlesip shyǵarýǵa bir modeldi qosamyz, al 2019 jyly taǵy eki úlgi qosylady. ıAǵnı, taǵy úsh kólik túrin shyǵarýdy josparlap otyrmyz», - dedi A. Lavrentev Astanada ótken Qazaqstan men Ózbekstan arasyndaǵy ekijaqty yntymaqtastyq jónindegi úkimetaralyq komıssııasynyń 17-otyrysynda.
Kompanııa basshysy aýyl sharýashylyǵy mashınalaryn qurastyrý boıynsha ózbekstandyq seriktestermen kelissózder júrgizilgenin atap ótti.
«Ózbekstan aýyl sharýashylyǵy mashınasyn qurastyrý úshin óte jaqsy baza bolady. Dálirek aıtsam, biz olardan úırenip jatyrmyz. Olardyń áleýeti joǵary. Máselen, belarýstik seriktesterimiz astyq jınaý kombaındary boıynsha úzdik bolsa, ózbekstandyq áriptesterimiz maqta jınaý tehnıkalary boıynsha №1 orynda. Búginde olar traktor kabınalaryn shyǵarady, kóptegen jabdyqtardy ózderi jasaıdy. Bul kooperatsııa bizge ázirlemege ýaqyt jumsamaı, daıyn ónimdermen jumys isteýge múmkindik beredi», - dep óz sózin túıindedi A. Lavrentev.
Aıta keteıik, búgin Astanada Qazaqstan Respýblıkasy men Ózbekstan Respýblıkasy arasyndaǵy ekijaqty yntymaqtastyq jónindegi úkimetaralyq komıssııasynyń 17-otyrysynda «AllurGroup» kompanııasy dırektorlar keńesiniń tóraǵasy Andreı Lavrentev pen «Ýzavtosanaot» AQ tóraǵasy Ýmýdjan Salımov ózara yntymaqtastyq týraly shartqa qol qoıdy.
