Qazaqstanda taǵy úsh memlekettik qoryq ashylady - Berik Ábdiǵalıuly

  ASTANA. QazAqparat - "Qasıetti Qazaqstan" ǵylymı-zertteý ortalyǵynyń basshysy Berik Ábdiǵalıuly jańadan ashylatyn úsh memlekettik qoryqqa qatysty arnaıy qaýlynyń shyqqanyn málimdedi, dep xabarlaıdy QazAqparat tilshisi.

"Búgin sizdermen jaqsy xabardy bóliskim kelip otyr. Mádenıet jáne sport mınıstrliginiń usynysymen arnaıy úsh memlekettik qoryq ashylaıyn dep jatyr. Prezıdent Ákimshiligi qoldady. Úkimet qaýlysy da shyqty. Bul - Memleket basshysynyń tapsyrmasy. Birinshi qoryq ol - Astananyń mańaıyndaǵy Bozoq. Ony kóbisi bile bermeıdi. Biraq Astana bul jerde kezdeısoq salynǵan joq. Ol - qazaq tarıxynda eleýli oqıǵalar bolǵan jer. Bozoq sonyń bir dáleli bolsa kerek. Bolashaqta sol jerde úlken mýzeı men vızıt-ortalyǵy ashylady", - dedi B.Ábdiǵalıuly "Bolashaqqa baǵdar: rýxanı jańǵyrý" baǵdarlamasy boıynsha esep berý kezdesýinde.

Onyń aıtýynsha, ekinshi qoryq - Botaı. Ol jerde adamzat balasy tuńǵysh ret jylqyny qolǵa úıretti. Ony álem ǵalymdary da moıyndap otyr. "Úshinshisi - Saraıshyq. Byltyrdan beri Atyraý oblystyq ákimdiginiń bastamasymen úlken jóndeý jumystary atqarylyp jatyr. Kezinde Qasym xandar eldiń astanasyn Ulytaýdan sol jerge aparǵan. Sóıtip, Altyn Ordanyń murageri biz ekenin kórsetti. Sondyqtan Saraıshyq biz úshin úlken geosaıası qundylyq. Sony nasıxattap, jetkize bilýimiz kerek", - dep atap kórsetti B.Ábdiǵalıuly.

Aıta ketsek, búgin Astanada QR Ulttyq mýzeıinde "Bolashaqqa baǵdar: rýxanı jańǵyrý" baǵdarlamasynyń bir jyldyǵyna arnalǵan esep berý jıyny ótti.