Qazaqstanda taǵy bir krıptoındýstrııa qaýymdastyǵy quryldy
Jańa uıym «DIGITAL NETWORK» sandyq texnologııalar men krıptoındýstrııa qaýymdastyǵy» jeke kásipkerler men zańdy tulǵalar birlestigi dep atalady.
«Bizdiń qaýymdastyǵymyz kommertsııalyq emes uıym bolyp sanalady. Bul - kásipkerlerdiń erikti birlestigi. Barlyǵymyz kásipkerlik salada blokcheın texnologııalaryn qoldaný qajettigin, sondaı-aq respýblıkada krıptoındýstrııany qurý kerektigin jaqsy túsinemiz ári osy bastamalardy qoldaımyz. Sondyqtan blokcheıin texnologııalaryn engizý salasynda ulttyq kompanııalarmen, iri jáne shaǵyn bıznespen áriptestik baılanystaryn ornatýdy kózdeımiz», - dedi uıym basshysy Oljas Murtazın Astanada ótken baspasóz máslıxatynda.
Onyń aıtýynsha, qaýymdastyq músheleri memlekettik organdarmen birlesip jumys istep, blokcheın men krıptovalıýtalar zańnamasyn ázirleýge aıtsalysady.
Aıta ketken jón, Qazaqstanda osy salada jumys isteıtin taǵy bir uıym bar. Onyń ataýy - Qazaqstannyń blokcheın jáne krıptovalıýtalar qaýymdastyǵy. Ony Eset Býtın basqarady.
DIGITAL NETWORK-tiń ınvestıtsııalardy tartý departamentiniń dırektory Erlan Shaıxymbaevtyń eki uıymnyń aıyrmashylyǵyn aıtyp berdi.
«Qazirgi kezde bizdiń qyzmetimizge uqsaıtyn taǵy bir qaýymdastyq bar. Bolashaqta olarmen bilim berý salasynda birlesken sharalardy ótkizýdi josparlap otyrmyz. Endi, ol kisiler eresek adam bolǵan soń bizden aıyrmashylyǵy - olar basqa tolqynda...Úlken aǵalarymyz. Bul jerde biz 30-ǵa deıingi jastar quryp jatqandyqtan, bizdiń tolqynymyz, bizdiń jumysqa degen jigerimiz anaǵurlym kúshtirek dep aıtsaq bolady. Sosyn ol kisilerde blokcheın tehnologııasy bolsa, biz tsıfrlyq tehnologııalar qaýymdastyǵy dep alyp otyrmyz. Demek, biz blokcheındi ǵana emes, elektrondy kommertsııany da qamımyz. Biz óz uıymymyzǵa ulttyq kompanııalardy, iri jáne shaǵyn bıznesti tartatyn bolamyz», - dep atap kórsetti E.Shaıxymbaev.
Foto: bloomchain.ru
