Qazaqstanda taǵy 5 munaı basseıni zertteledi

NUR-SULTAN. QazAqparat – Energetıka vıtse-mınıstri Áset Maǵaýov elimizde Geologııalyq barlaý memlekettik baǵdarlamasy ázirlenip jatqanyn málim etti, dep habarlaıdy QazAqparat tilshisi.

«Geologııalyq barlaý sektorynyń ınvestıtsııalyq tartymdylyǵyn jaqsartý boıynsha júrgizilip jatqan jumysty atap ótken jón. Jer qoınaýyn paıdalaný salasyn retteýdi jeńildetý úshin túzetýler toptamasy ázirlendi. Jer qoınaýyn paıdalaný quqyǵyn berý boıynsha elektrondyq aýktsıon tetigi ázirlendi. Teńizdegi geologııalyq barlaýǵa basymdyq berýdiń arqasynda 2018 jyldan bastap birqatar joba iske asyryldy. Atap aıtqanda, «QazMunaıGaz» jáne áriptes ENI – Isataı, Abaı kenishterin, «QazMunaıGaz» ben «Lýkoıl» kompanııasy Jeńis blogyn damyta bastady», - dedi Áset Maǵaýov OKQ-da ótken baspasóz máslıhatynda.

Vıtse-mınıstrdiń aıtýynsha, teńiz jobalarymen birge Qazaqstannyń az zerttelgen aýmaqtarynda geologııalyq barlaýdy jandandyrý josparlanyp otyr.

«Ekologııa, geologııa jáne tabıǵı resýrstar mınıstrligimen birlesip, 2021-2025 jyldarǵa arnalǵan Geologııalyq barlaý memlekettik baǵdarlamasy ázirlený ústinde. Baǵdarlama sátin salsa 2020 jyly qabyldanady. Aral, Syrdarııa, Ertis boıy, Shý-Sarysý, Soltústik Torǵaı sııaqty 5 keleshegi mol basseındi zerdeleý úshin memlekettik ınvestıtsııa salý kózdeledi. Zertteý dárejesin arttyrý budan ári jer qoınaýyn paıdalanýǵa jeke ınvestıtsııa tartýǵa múmkindik beredi», - dedi ol.