Qazaqstanda taǵy 4 túrme jabylady
Bas prokýrordyń orynbasary Marat Axmetjanovtyń aıtýynsha, 27 jyldyń ishinde elimizde túrmege qamalǵandardyń sany 68,5 myń adamǵa azaıdy. Táýelsizdiktiń alǵashqy jyldary Qazaqstan osy kórsetkish boıynsha álemde úshinshi orynda turdy.
«Ol kezde árbir jetinshi otbasyda sottalǵan bir adam boldy. Degenmen, atalǵan kórsetkish birtindep azaıdy. Qazirgi kezde respýblıka boıynsha 29 913 adam túrmede otyr», - dedi M.Axmetjanov elordada ótken baspasóz máslıxatynda. 
Onyń sózine qaraǵanda, osy ýaqytqa deıin 8 túrme jabyldy. Sonyń nátıjesinde 12 mıllıard teńge kóleminde bıýdjet qarajaty únemdeldi. Budan bólek, aldaǵy ýaqytta taǵy 4 eski kolonııa jabylady.
«Bir jyldyń ishinde túrmede otyrǵan adamdardyń sanyna qatysty xalyqaralyq reıtıngte Qazaqstan óz pozıtsııasyn 12 satyǵa jaqsartty. Buryn 83 orynda edik, qazir 95-ke tústik. Bul ındekste 200 memleket bar. Biz 95-shi orynda turmyz», - dep atap kórsetti M.Axmetjanov.
Resmı málimetke sáıkes, zańnamany izgilendirýi sharalary kezinde qylmystardyń sany artqan joq. Statıstıka boıynsha qylmystyq tártipti buzý oqıǵalary jyl saıyn azaıyp keledi. Byltyr atalǵan kórsetkish 8 protsentke tómendese, bıyl úsh aıda 6 protsentke qysqardy.
«Osy oraıda erekshe atap óter jáıt, asa aýyr qylmys jasaǵan qylmyskerlerdiń isteri izgilendirýge jatpaıdy. Olardyń ishinde ekstremıster, pedofılder, terrorıster, uıymdasqan qylmystyq toptyń músheleri, adam óltirgen jáne qaraqshylyq shabýyl jasaǵan qylmyskerler bar. Ondaı isterdiń keıbir sanattary boıynsha qylmystyq jaýapkershilik kerisinshe kúsheıtildi», - deıdi M.Axmetjanov.
Aıta keteıik, búgingi brıfıngte Bas prokýrordyń orynbasary áleýmettik jelide taraǵan vıdeoǵa qatysty pikir bildirdi. Belgisiz bireý iri kólemde aqsha jymqyrǵan Bergeı Rysqalıev Ulybrıtanııada júrgenin túsirip alypty.
Budan bólek, M.Axmetjanov maldy 20 ret urlaǵan barymtashylardyń ustalǵanyn málimdedi.
