Qazaqstanda taǵy 34 baǵytta jolaýshylar poıyzy qatynaı bastady

NUR-SULTAN. QazAqparat – Búgin elimizde taǵy 34 jolaýshylar poıyzynyń qozǵalysyna ruqsat berildi, dep habarlaıdy QazAqparat tilshisi.

«Koronavırýstyń taralýyna jol bermeý jónindegi vedomstvoaralyq komıssııanyń sheshimimen jáne QR Indýstrııa jáne ınfraqurylymdyq damý mınıstrliginiń kelisimimen 10 maýsymnan bastap Qazaqstan boıynsha kóliktegi bas memlekettik sanıtarlyq dárigerdiń talaptaryn eskere otyryp, taǵy 34 (Qulsary, Maqat jáne taǵy basqa stantsııalardaǵy karantındik rejımge baılanysty 5 poıyzdan basqa) jolaýshylar poıyzy iske qosylady», - delingen «Qazaqstan temir joly» Ulttyq kompanııasy« AQ-nyń baspasóz habarlamasynda.

Sondaı-aq, ulttyq kompanııa málimetinshe, jazǵy kezeńde Alakól kóline 2020 jyldyń 11 maýsymynan bastap № 459-6941/6942-460 «Óskemen-Dostyq» jáne № 457-6941/6942-458 «Semeı-Dostyq» poıyzy kún saıyn qatynaıdy.

Al 14 maýsymnan bastap № 255/256 «Almaty 2 – Dostyq» poıyzy aptasyna úsh ret qatynaıtyn bolady.

Munan bólek, 18 maýsymynan № 258/257 «Nur-Sultan 1 – Dostyq» poıyzy aptasyna eki ret júredi.

«Memlekettik shekaralar ashylǵannan jáne basqa memleketterdiń temirjol ákimshilikterimen kelisilgennen keıin qalǵan baǵyttar kezeń-kezeńimen iske qosylady», - dep atap ótedi kompanııadan.

Esterińizge sala keteıik, Kóliktegi bas memlekettik sanıtarlyq dárigerdiń qaýlysyna sáıkes, 10 maýsymnan bastap sanıtarlyq-zalasyzdandyrý rejımi jáne ózge de shekteý sharalary qatań saqtalǵan jaǵdaıda poıyzdarda vagon meıramhana jáne vagon barlardyń jumysy jandandy.

El ishindegi temirjol qatynasy 1 maýsym kúni qaıta jandanyp, poıyz tasymaly úsh kezeńmen qalpyna keltiriletini jazylǵan bolatyn.