Qazaqstanda taǵy bir sheteldik ýnıversıtettiń fılıaly ashylýy múmkin
ASTANA. KAZINFORM — Aqtaýda malaızııalyq Sunway University fılıalyn ashý múmkindigi talqylandy, dep habarlaıdy Ǵylym jáne joǵary bilim mınıstrliginiń baspasóz qyzmeti.
QR Ǵylym jáne joǵary bilim mınıstri Saıasat Nurbek Malaızııadaǵy Sunway University prezıdenti ári vıtse-kantsleri Poppema Sıbrandespen ekijaqty kezdesý ótkizdi.
Kezdesý barysynda taraptar Aqtaý qalasynda Sunway University fılıalyn ashý perspektıvalaryn, sondaı-aq joǵary bilim men ǵylym salalaryndaǵy yntymaqtastyqty keńeıtý máselelerin talqylady.
Mınıstr qazaqstandyq joǵary bilim berý júıesin ınternatsıonaldandyrý baǵytynda atqarylyp jatqan jumystarmen tanystyryp, sheteldik stýdentterdi tartý jáne álemniń jetekshi ýnıversıtetteriniń fılıaldaryn ashý jónindegi baǵdarlamalardyń júzege asyrylýy týraly aqparat berdi.
— Óz kezeginde Sunway University prezıdenti Poppema Sıbrandes oqý ornynyń jetistikteri men strategııalyq damý baǵyttary jóninde baıandady. Ol ýnıversıtet túlekterine eńbek naryǵynda joǵary suranys bar ekenin atap ótip, bul kórsetkish boıynsha oqý orny Malaızııanyń joǵary oqý oryndary arasynda jetekshi oryndardyń birin ıelenetinin aıtty. Sonymen qatar ýnıversıtet basshysy 2030 jylǵa deıin oqý ornynyń akademııalyq bedelin odan ári nyǵaıtyp, halyqaralyq deńgeıdegi abyroıyn arttyrý josparlary týraly málimdedi, — delingen vedomstvo habarlamasynda.
Kezdesý qorytyndysy boıynsha taraptar joǵary bilim, ǵylym jáne akademııalyq utqyrlyq salalaryndaǵy ekijaqty yntymaqtastyqty odan ári damytýǵa jáne nyǵaıtýǵa ózara múddeli ekenderin rastady.
Atalǵan kelissózder Qazaqstan men Malaızııa arasyndaǵy ózara senim men strategııalyq seriktestiktiń joǵary deńgeıin aıqyn kórsetti. Sondaı-aq olar jańa birlesken bilim berý jáne ǵylymı jobalardy iske asyrýǵa qosymsha múmkindik qalyptastyrdy.
Buǵan deıin qazaqstandyq JOO tsıfrlyq bilim berý boıynsha álemdik úzdik úlgiler qatarynda atalǵanyn jazǵanbyz.
