Qazaqstanda taǵy 14 aýyl sapaly aýyz sýmen qamtyldy
ASTANA. KAZINFORM – 2026 jyly Sý resýrstary jáne ırrıgatsııa mınıstrligi Aqtóbe, Aqmola jáne Qyzylorda oblystaryndaǵy 45,5 myńnan astam turǵyndy sapaly aýyz sýmen qamtýǵa baǵyttalǵan birqatar jobany aıaqtady.
Mınıstrliktiń Sý sharýashylyǵy komıteti aýyldyq eldi mekenderdi aýyz sýmen qamtamasyz etýdi jaqsartý maqsatynda toptyq sý qubyrlaryn salý jáne rekonstrýktsııalaý jumystaryn júrgizdi.
Atalǵan jobalar úsh oblystaǵy jalpy sany 45,5 myńnan astam adam turatyn 14 aýyldy qamtydy.
Júrgizilgen jumystar aıasynda jalpy uzyndyǵy 53,6 shaqyrym jańa sý qubyry tartylyp, qoldanystaǵy 62,9 shaqyrym sý qubyry rekonstrýktsııalandy.
Sonymen qatar sý qubyry qurylystaryna arnalǵan alańdar, taza sý rezervýarlary men sý kóterý sorǵy stantsııalary salyndy.
– Qazirgi ýaqytta komıtet toptyq sý qubyrlaryn salý jáne rekonstrýktsııalaý jumystaryn jalǵastyryp jatyr. Búginde jalpy sany 443,2 myń adam turatyn 131 eldi mekenniń aýyz sýmen qamtylýyn jaqsartýǵa múmkindik beretin 14 joba júzege asyrylýda, – dedi QR Sý resýrstary jáne ırrıgatsııa mınıstrligi Sý sharýashylyǵy komıtetiniń tóraǵasy Nurbek Serikov.
Osylaısha, bıyl aıaqtalǵan jobalarmen qatar, komıtet taǵy 131 eldi mekenniń aýyz sýmen qamtylýyn jaqsartýǵa baǵyttalǵan jumystardy júzege asyryp jatyr.
Aıta keteıik, buǵan deıin elimizde 142 aýyldy qamtıtyn 12 aýyzsý jobasyn aıaqtaý josparlanǵany habarlanǵan edi. Bul jobalar shamamen 540 myń turǵynnyń sýmen jabdyqtalýyn jaqsartýǵa baǵyttalǵan.