Qazaqstanda taǵy 1000 aýyl mektebi jańǵyrtylady

ASTANA. KAZINFORM — Qazaqstannyń shaǵyn qalalary men aýyldaryndaǵy taǵy 1000 mektep jańa oqý jylynda jańǵyrtýdan ótedi, dep habarlaıdy Oqý-aǵartý mınıstrligi.

Memleket basshysynyń tapsyrmasy boıynsha shaǵyn qalalarda, aýdan ortalyqtarynda jáne aýyldarda mektepterdi jańǵyrtý jumystary jalǵasyp jatyr. Jyl saıyn keminde 1000 mektep jeti baǵyt boıynsha jańǵyrtýdan ótedi.

Jańǵyrtýdyń maqsaty — balalardyń bilim alýy men tárbıelenýi úshin qolaıly jaǵdaı jasaý, materıaldyq-tehnıkalyq bazany nyǵaıtý arqyly qalalyq jáne aýyldyq mektepter arasyndaǵy bilim sapasyndaǵy alshaqtyqty azaıtý.

Jańǵyrtý aıasynda kúrdeli jáne aǵymdaǵy jóndeý jumystary, pándik kabınettermen jabdyqtaý, mektep jıhazdaryn jańartý, kitaphanalar men ashanalardy, qaýipsizdik jaǵdaılaryn jaqsartý qarastyrylǵan.

— Osylaısha, 2025–2026 oqý jylynda robototehnıka, hımııa, bıologııa, fızıka jáne STEM baǵyttary boıynsha 1000-ǵa jýyq zamanaýı pándik kabınet satyp alý josparlanyp otyr. 509 mekteptiń kitaphanasyn, 375 mekteptiń ashanasyn jańǵyrtý, 598 mektepke kúrdeli jáne aǵymdaǵy jóndeý júrgizý, 409 mekteptiń jıhazdaryn jańartý josparlanǵan. Júrgizilgen jumystardyń nátıjesinde 369 myń oqýshynyń oqý jaǵdaıyn jaqsartý kózdelýde, — delingen habarlamada.

Budan buryn «Keleshek mektepteri» ulttyq jobasy aıasynda barlyǵy 460 myń oqýshy orny ashylatyny anyqtaldy.