Qazaqstanda taǵam, janarmaı, lıftige qatysty tehnıkalyq reglament qaıta qaralady
ASTANA. KAZINFORM – Eýrazııalyq ekonomıkalyq odaq elderine ortaq tehnıkalyq reglamenttiń talaptaryna taldaý júrgiziledi. Bul týraly Saýda jáne ıntegratsııa mınıstrligi habarlaıdy.
Bıyl qańtarda Eýrazııalyq ekonomıkalyq komıssııa (EEK) Keńesi EAEO-nyń (Eýrazııalyq ekonomıkalyq odaq) qoldanystaǵy tehnıkalyq reglamentteriniń jáne olarǵa standarttar tizbesiniń ǵylymı-tehnıkalyq deńgeıin baǵalaýǵa baǵyttalǵan is-sharalar josparyn bekitti.
Atalǵan josparǵa sáıkes aldaǵy 5 jylda 29 tehreglament taldaýdan ótedi. Qajet bolǵan jaǵdaıda tizim keńeıtilýi múmkin.
Taldaý barysynda eskirgen jáne artyq talaptardy joıyp, halyqaralyq standarttarǵa sáıkestendirý josparlanyp otyr. Bul EAEO-ǵa múshe memleketterdiń óndirýshileri men tutynýshylary úshin biryńǵaı, túsinikti jáne zamanaýı talaptardy qalyptastyrýǵa múmkindik beredi.
- Birinshi kezekte baǵalaýǵa 10 jyldan astam ýaqyt buryn qabyldanǵan, sondaı-aq 5 jyldan astam ýaqyt boıy ózgertilmegen tehnıkalyq reglamentter jatady. Budan basqa, EAEO elderinen ótinishterdiń edáýir sany kelip túsetin reglamentter qamtylǵan. Jumysty EAEO-ǵa múshe memleketterdiń ýákiletti organdary beıindi ǵylymı uıymdar men bıznes-qoǵamdastyqtardyń ókilderin, sondaı-aq Eýrazııalyq ekonomıkalyq komıssııanyń tıisti departamentteriniń sarapshylaryn tarta otyryp júrgizedi,- delingen habarlamada.
Qazaqstanǵa qatysty 8 tehnıkalyq reglament bekitilgen, olardyń ishinde, lıft qaýipsizdigi, janar-jaǵarmaıǵa qoıylatyn talaptar jáne taǵam qaýipsizdigi bar. Belarýs Respýblıkasy aýyl sharýashylyǵy tehnıkasynyń qaýipsizdigi men tamaq ónimderin tańbalaýdy qosa alǵanda 5 tehnıkalyq reglamentpen aınalysady. Reseı Federatsııasy pırotehnıkalyq ónimderdiń, kólik dóńgelekteri, balalar taýarlary men sút ónimderiniń qaýipsizdigin qosa alǵanda 16 tehnıkalyq reglamentti taldaıdy.
- Bul jumys EAEO tehnıkalyq reglamentteriniń ózektiligin, olardyń halyqaralyq standarttarǵa sáıkestigin, synaq ádisterimen qamtamasyz etilý dárejesin jáne olardyń ekonomıka salalary úshin mańyzdylyǵyn qamtamasyz etý úshin turaqty negizde júrgiziledi, - deıdi mınıstrlikten.
Eske sala keteıik, jyl basynda Úkimet basshysy Oljas Bektenov Almatyda ótken Eýrazııalyq úkimetaralyq keńes otyrysynda EAEO-ǵa qatysýshy elder úkimetteriniń basshylarymen Odaq sheńberindegi ózara is-qımyldyń negizgi aspektileri men yntymaqtastyqtyń keleshegin talqylady.