Qazaqstanda tabystardy jalpy resmı jarııalaý 2013 jyldan bastalady

Bul týraly búgin Parlament Senatynda depýtattarmen kezdesý barysynda QR Qarjy mınıstrligi Salyq komıtetiniń tóraǵasy Dáýlet Erǵojın málim etti.

Búginde tabystardy jalpy jarııalaý ózekti másele ekenine toqtalǵan ol, «bizdiń aldymyzǵa jalpy resmı jarııalaý boıynsha bıylǵy qyrkúıekte Salyq kodeksine jáne basqa da zańnamalarǵa ózgerister engizý boıynsha zań jobasymen Parlamentke barý maqsaty qoıyldy»,-dedi.

D. Erǵojınniń aıtýynsha, Úkimet jalpy jarııalaýǵa kóshýdiń tujyrymdamasyn maquldady jáne ol tórt kezeńnen turady. Birinshi kezeńde, ıaǵnı aǵymdaǵy jyldyń sońyna deıin oǵan kóshýdiń negizderin jáne álemdik tájirıbeni anyqtaý turǵysyndaǵy sharalar iske asyrylady. Al aldaǵy eki jylda júıelerdi qaıta jabdyqtaý jumystary júrgizilmek. 2014 jyly bastapqy deklaratsııa tapsyrylady. Sondaı-aq 2015 jyly kezekti deklaratsııa ázirlenip, bul úrdis ary qaraı jalǵasa beredi.

Atap aıtqanda, bul turǵyda jalpy resmı jarııalaý jumystary 2013 jyly bastalady, al 2017 jyly bul jalpy jarııalaý sharalary barlyǵyn qamtıtyn bolady.

Osy oraıda komıtet basshysy tabysty resmı jarııalaý kóleńkeli ekonomıkanyń jolyn kesetinin, memlekettik organdardaǵy jemqorlyqty tómendetetinin, bıýdjet túsimindegi salyq bazasyn keńeıtetinin, túrli qylmystardy tergeý amaldaryndaǵy tıimdilikti arttyratynyn, sondaı-aq elimizdegi salyq tóleýshiniń mádenıetin joǵarylatýǵa septigin tıgizetinin atap ótti.