Qazaqstanda tabylǵan qundy jádigerlerdi úlken murajaılardyń brendine aınaldyrý kerek - H. Ábjanov
ASTANA. QazAqparat - Qazaqstanda álemdik deńgeıdegi 2-3 murajaıdy alǵa shyǵarý kerek. Bul týraly búgin Ortalyq kommýnıkatsııalar qyzmetindegi baspasóz máslıhatynda t.ǵ.d., professor, «Sh.Ýálıhanov atyndaǵy tarıh jáne etnologııa ınstıtýty» RMQK dırektory Hankeldi Ábjanov málim etti.
«Elimizde murajaılar az emes, 300-deı murajaı bar. Endi osylardyń kem degende 2-3-in álemdik deńgeıge kóterýimiz kerek. Máselen, tanymal «Lývr», «Ermıtaj» sekildi. Al bul deńgeıge jetý úshin bizdiń álemdik deńgeıge kóteriletin mýzeıdiń ózindik brendi bolýy qajet. Atap aıtqanda, bul turǵyda «Altyn adamdy» nemese Berelden tabylǵan jádigerler, Saraıshyqtan shyqqan dúnıelerdi negizge alý kerek. Osyndaı álem súısinetin, dúnıejúzinen adamdar arnaıy kelip qaraıtyn brend kerek», - dedi ǵalym.
Osy oraıda H. Ábjanov Qazaqstan aýmyǵynan kóptegen qundy jádigerler tabylǵanyn aıta kele, osylardy úlken murajaılardyń brendine aınaldyrýǵa erekshe mán berý kerek ekenin jetkizdi.
«Esikten tabylǵan «Altyn adamdy» mýzeıdiń brendine aınaldyrý qajet. Qazirgi kezde qaı mýzeıge barsań da «Altyn adam» (kóshirmesi) tur. Negizi osy qundy jádigerlerdi biz mýzeıdiń brendine aınaldyrsaq, álemdik deńgeıdegi kem degende 2-3 murajaıdy qura alar edik», - dedi professor.
Sonymen qatar ǵalym tarıhı-mádenı qoryq-murajaılardyń aýmaqtyq tutastyǵyn saqtaýǵa erekshe nazar aýdarý kerek ekenin atap ótti.
