Qazaqstanda tabysy joq jastarǵa nesıe bermeý talaby engizilmek

Jastarǵa nesıe berýde shekteý engizilmek. Bul týraly Májiliste «Halyqtyń shamadan tys kredıt alýyn azaıtý jáne qarjylyq saýattylyqty arttyrý» taqyrybyndaǵy Parlament tyńdaýynda Qarjy naryǵyn retteý jáne damytý agenttiginiń tóraǵasy Mádına Ábilqasymova aıtty, dep habarlaıdy Kazinform.

«Agenttik nesıe boıynsha 90 kúnnen astam merzimde ótemegen adamdarǵa kepilsiz tutyný nesıesin berýge tyıym salýdy kózdeıtin zańnamalyq túzetýler ázirledi», - dedi Mádına Ábilqasymova parlamenttik tyńdaýda.

Onyń aıtýynsha, qazir mundaı shekteý tabysy eń tómengi jalaqydan az qaryz alýshylarǵa ǵana qatysty.

«Sonymen qatar, jastar arasynda problemaly qaryzdyń ósýin eskere otyryp, 21 jasqa tolmaǵan azamattarǵa nesıe berý tek resmı tabysy bolǵan jaǵdaıda ǵana júzege asyrylady degen talapty engizý usynylyp otyr», - dedi agenttik basshysy.

Budan buryn habarlanǵandaı, problemaly kredıtti kollektorlyq uıymdarǵa satýǵa tyıym salynady.