Qazaqstanda tabıǵı monopolııalar sýbektileriniń qyzmeti áldeqaıda ashyq bolmaq
ASTANA. QazAqparat - «QR keıbir zańnamalyq aktilerine tabıǵı monopolııalar men rettelmeli naryqtar máseleleri jónindegi ózgertýler men tolyqtyrýar engizý týraly» zań aıasynda monopolısterdiń qyzmetiniń ashyqtyǵyn arttyrý qamtamasyz etiledi, dep habarlaıdy primeminister.kz.
Bul týraly búgin «Turǵyn-úı kommýnaldyq sharýashylyq salasyndaǵy tabıǵı monopolııalar salasynyń uzaq merzimdi, sapaly, tıimdi ınvestıtsııalyq baǵdarlamalaryn ázirleý» atty jáne «Nurly jol» baǵdarlamasy men halyqaralyq qarjy ınstıtýttarynyń qarjylaryn tartý máselesine arnalǵan semınarda QR Ulttyq ekonomıka mınıstrliginiń Tabıǵı monopolııalardy retteý jáne básekelestikti qorǵaý komıtetiniń tóraǵasy Serik Jumanǵarın málim etti.
«Sýbektilerdiń tarıf qalyptastyrý qyzmetiniń ashyqtyǵy arttyrylady, ıaǵnı tabıǵı monopolııalar sýbektileriniń qyzmeti týraly málimet keńeıtiledi, ol ınternet-resýrstarda jarııalanady», - dedi S.Jumanǵarın.
Osylaısha, Komıtet basshysynyń aıtýynsha, jańa zańnama aıasynda monopolııalyq jaǵdaıdaǵy kásiporyndar qyzmetindegi ákimshilik kedergiler tómendetiledi, ınvestıtsııalyq baǵdarlamalar men tabıǵı monopolııalardyń basqa da mindetterdiń oryndalýyn baqylaý kúsheıtiledi, básekelestik qyzmetti yntalandyrýǵa jaǵdaı jasalady.
Budan ózge, vedomstvo basshysy jylýmen qamtý sektoryn reformalaý boıynsha Keshendi josparǵa jáne óńirlerge gazdandyrý boıynsha memorandýmdarǵa sáıkes jumys barysy týraly aıtty, taıaý 5 jylǵa tarıf qalyptastyrýdyń ındıkatıvti jospary jasalǵan.
«Biz bıyl Ońtústik Qazaqstan, Qostanaı oblystaryn belsendi gazdandyrýmen aınalysyp jatyrmyz, buıryqtar jasaldy. Keshe Qyzylorda, Aqtóbe oblystary boıynsha gazdandyrý buıryqtaryna qol qoıdyq, bıyl alda Mańǵystaý oblysy bar. Kelesi jylǵa taǵy 5 oblysta iske qosamyz. Úlken jumys jasalyp, júzdegen myń adam gazben qamtamasyz etiledi, júzdegen myń shaqyrymǵa jeliler tartylady», - dep tolyqtyrdy ol.
2015 jyldyń 5 mamyrynda Memleket basshysy «QR keıbir zańnamalyq aktilerine tabıǵı monopolııalar men rettelmeli naryqtar máseleleri jónindegi ózgertýler men tolyqtyrýlar engizý týraly» QR Zańyna qol qoıdy. Jańa túzetýler aǵymdaǵy jyldyń 17 mamyrynda kúshine endi.
