Qazaqstanda tabıǵı gaz óndirisi 7 paıyzǵa ósti
NUR-SULTAN. QazAqparat - 2020 jyldyń qańtar-mamyrynda elimizde suıyq nemese gazǵa aınalǵan kúıde tabıǵı gazdy óndirý kólemi 24,8 mlrd tekshe metrge jetti. Bul ótken jyldyń dál osyndaı kezeńinde óndirilgen gaz kóleminen 7,2 paıyzǵa kóp. Aqshaǵa shaqqanda atalǵan kezeńde 141,9 mlrd teńgeniń gazy óndirildi, dep habarlaıdy QazAqparat tilshisi energyprom.kz portalyna silteme jasap.
Óńirlik shekte Atyraý oblysynda óndirilgen tabıǵı gazdyń kólemi joǵary bolyp tur. Bul oblysta 11,2 mlrd tekshe metr gaz óndirilip otyr. Sonymen qatar Batys Qazaqstan oblysynda - 9,1 mlrd, Aqtóbe oblysynda - 2,6 mlrd tekshe metr gaz óndirilgen.
Qazaqstan 2020 jyldyń qańtar-sáýirinde 6,3 mlrd tekshe metr kógildir otynyn eksportqa shyǵardy. Biraq jyldqy mánde eksport kólemi 34,9 paıyzǵa qysqaryp otyr. Qazaqstannyń tabıǵı gazynyń negizgi, naqty aıtqanda 566,1 mln dollardy quraıtyn kólemi Qytaı eline eksporttalǵan. Qytaıǵa eksporttyń jyldyq ósimi naqty mánde 7,4 paıyzǵa, al aqshaǵa shaqqanda 2,5 paıyzǵa artty.
Al TMD elderine 101,5 mln dollardyń 2,1 mlrd tekshe metr gazy eksportqa shyǵaryldy. Bul rette Qazaqstan gazynyń negizgi ımporttaýshysy - Reseı. Jalpy TMD elderine eksporttalǵan gazdyń 75,5 paıyzy Reseıge eksporttalǵan.
Aıta keterligi, QR Energetıka mınıstrliginiń málimetinshe, 2020 jylǵy 3-toqsanda suıytylǵan munaı gazyn kóterme saýdada ótkizýdiń baǵalary qosylǵan qun salyǵyn (QQS) esepke almaǵanda 28 000 teńgeni quraıdy.
Shekti baǵa 2018 jyldyń І-toqsany - 2020 jyldyń І-toqsany aralyǵynda QQS esebinsiz tonnasyna 38 701,67 teńge deńgeıinde saqtaldy.
