Qazaqstanda tabıǵat pen qorshaǵan orta úshin sýdyń qajettiligi esepke alynbaı keledi
ASTANA. Naýryzdyń 11-i. QazAqparat /Qanat Mámetqazyuly/ - Qazaqstanda tabıǵat pen qorshaǵan orta úshin sýdyń qajettiligi esepke alynbaı keledi. Bul týraly búgin QR Parlamenti Májilisinde Eýropalyq Odaqtyń «Qazaqstan Respýblıkasynda ekologııalyq saıasattyń quraldaryn engizý» atty jobasynyń tanystyrylymy barysynda jobanyń bas sarapshysy Bolat Esekın aıtty,
dep habarlaıdy QazAqparat.
«Atap aıtqanda, elimizde búgingi kúni Aralǵa, Kaspııge, Balqashqa qanshalyqty mólsherde, qandaı sapadaǵy sý qosylyp turatyny, osy turǵydaǵy maýsymdyq qajettilikterdiń kólemi eseptelip otyrǵan joq. Eń quryǵanda, Aral men Balqashty qutqarý mıssııasy boıynsha teńizge quıylatyn maýsymdyq sý mólsherleri eske alynyp, onyń baqylaýyn uıymdastyrǵan oryndy bolar edi. Tipti Qazaqstanda bundaı esepteýlerge jaýapty organ joq dese de bolady. Máselen, Aýyl sharýashylyǵy Sý resýrstary komıtetiniń negizgi qyzmeti sýmen qamtamasyz etý, onyń ishinde ekonomıkalyq qajettilikter úshin sýdyń qamtymdylyǵyn qadaǵalaý bolyp tabylady. Al, maýsym saıyn Balqashqa nemese Aralǵa sýdyń qosylýy nemese qosylmaýy qandaı da bir organ tarapynan múldem qadaǵalanbaıdy», dedi B. Esekın.
Onyń sózine qaraǵanda, elimizdegi aýyl sharýashylyǵy salasynda da sý qadaǵalaýsyz paıdalanylady. Sonymen birge bas sarapshy Qazaqstandaǵy sýdy basqarýǵa qatysty ókilettikterdiń bytyrańqy bólingenine nazar aýdartty. «Máselen, sýmen qamtýdy Sý resýrstary komıteti qadaǵalasa, sapasy ekologııaǵa, jerasty sýlary geologııaǵa, transshekaralyq ózender Syrtqy ister mınıstrliginiń qaraýyna berilgen. Sondyqtan da, keı jaǵdaılarda sýdy basqarýǵa qatysty júıelilik oryndalmaıdy», dedi B. Esekın.
