Elimizde ІT qyzmetteriniń eksporty 1 mlrd dollardan asty
ASTANA. KAZINFORM — Memleket basshysy Qasym-Jomart Toqaev Respýblıka kúnine arnalǵan saltanatty jıynda sóz sóılep, Qazaqstannyń tsıfrlyq damýyndaǵy jetistikterdi atady, dep habarlaıdy Aqordanyń baspasóz qyzmeti.
Onyń sózinshe, Qazaqstanda jasandy ıntellekt qoǵamnyń barlyq salasyna engiziledi.
— Jeti jyl ishinde on myńdaǵan shaqyrym avtokólik joly men temirjoldar salynyp, jóndeldi. Eýropa men Azııanyń arasyn jalǵap turǵan kólik, energetıka jáne tsıfrlyq toraptar Qazaqstan arqyly ótip jatyr. Qazaqstan orta derjava retinde álemdik tártiptiń nyǵaıýyna eleýli qosyp kele jatqan, damyǵan, turaqty ári zaıyrly memleket bolyp tanyldy. Syndarly jáne jaýapty syrtqy saıasattyń arqasynda elimizdiń álemdik abyroı-bedeli artýda. Qazaqstan tólqujatynyń mártebesi joǵary. Elimizdiń azamattary men bıznes ókilderi úshin barlyq eldiń esigi ashyq. Sonymen qatar Qazaqstan dúnıe júzinde bolyp jatqan túbegeıli tsıfrlyq ózgeristerge belsene qatysýda. Elordamyzda Alem.ai halyqaralyq jasandy ıntellekt ortalyǵy men zamanaýı Astana Hub tehnoparki jumys isteıdi. ІT qyzmetterdiń eksporty 1 mıllıard dollardan asty. Eki sýperkompıýter iske qosyldy. Onyń ıgiligin otandyq kompanııalar men ǵalymdar kórip jatyr. Jaqynda asa qýatty taǵy bir sýperkompıýter paıdalanýǵa beriledi. Jańadan salynyp jatqan data ortalyqtar klasteri – Derekterdi óńdeý ortalyǵynyń alqaby tsıfrlyq ekonomıkanyń berik negizin qalaıdy. Biz Digital Qazaqstan jalpyulttyq strategııasyn júzege asyrýdy qolǵa aldyq, jasandy ıntellekt tehnologııasy qoǵamnyń barlyq salasyna engiziledi. Munyń bári – tsıfrlyq, basqasha aıtqanda, halqymyzdyń ıgiligine qyzmet etetin órkendegen memleket qurýǵa baǵyttalǵan qadam, — dedi Qasym-Jomart Toqaev.
