Qazaqstanda syrttaı bilim alý túri ózgertiledi
ASTANA. QazAqparat - Qazaqstanda joǵary bilimdi «part-time» júıesi boıynsha alýǵa bolady. Bul týraly QR Bilim jáne ǵylym vıtse-mınıstri Ashat Aımaǵambetov málim etti, dep habarlaıdy QazAqparat.
Budan buryn habarlanǵandaı, elde syrttaı oqý 2019 jyldyń 1 qańtarynan bastap toqtatylady.
«Biz «part-time» ınstıtýty qajet ekenin kórip otyrmyz. Osynyń qajettigin sezinip otyrǵan azamattar bar, sebebi ómirde túrli jaǵdaılar týyndaıdy. Alaıda bul ınstıtýt ózgertiledi. Qazirgi kezde tıisti normatıvtik-quqyqtyq baza daıyndalyp jatyr. «Part-time» arqyly bilim berýge bolady, biraq birshama túzetýler eskeriledi. Birinshiden, olar mindetti túrde 65 emes, ıaǵnı bilim standartyna sáıkes tıisti baǵdarlama boıynsha kredıtterdiń kóleminen 100 paıyzyn oqıtyn bolady. Ekinshiden, biz qashyqtyqtan oqytatyn tehnologııalardy paıdalanamyz. Ol úshin proktorıngtiń arnaıy júıesin ázirleý qajet», - dedi vıtse-mınıstr baspasóz máslıhatynda.
Onyń sózine qaraǵanda, syrttaı oqıtyn stýdentter kúndizgi bólimdegi qatarlastary ıegerip júrgen kólemniń 65 paıyzǵa jýyǵyn qamtıdy. Degenmen de olar birdeı dıplomdardy alady jáne naryqta olardyń qaısysy bilimin syrttaı meńgergenin bilmeı jatady.
Sonymen qatar, vıtse-mınıstr aǵymdaǵy jyly burynǵy norma boıynsha bilim berý jalǵasatynyn, sáıkesinshe, JOO-lar stýdentterdi dástúrli júıemen qabyldaı alatyndyǵyn naqtylady. Munymen qosa, atalǵan forma aıasynda oqyp jatqandar da dıplomdaryn alǵansha oqýlaryn jalǵastyrady.
A. Aımaǵambetov syrttaı bilimdi toqtatý qadamyna toqtala kele, atalǵan formaǵa 2010 jyldan bastap ishinara tyıym salynǵanyn jetkizdi. Máselen, syrttaı oqýǵa joǵary bilimdi ekinshi márte alatyndar nemese ulttyq biliktilik sheńberiniń úshinshi deńgeıindegi kolledj túlekteri túsedi. Sonyń ózinde, kóp mamandyqtar olar úshin qoljetimsiz. Mysaly, medıtsına, veterınarııa, qurylys jáne basqa baǵyttar.
