Qazaqstanda syra men sharap jarnamasyna ruqsat berilmek
NUR-SULTAN. QazAqparat - Qazaqstanda syra men sharap jarnamasyna ruqsat berilmek. Bul týraly búgin QR Aqparat jáne qoǵamdyq damý mınıstrligi BAQ salasyndaǵy memlekettik saıasat departamentiniń dırektory Baqnııaz Qarashına aıtty, dep habarlaıdy QazAqparat tilshisi.
«Zań jobasy aıasynda 5 negizgi normany engizý kózdelip otyr. Birinshi – otandyq baspasóz, BAQ úshin salyqtyq jeńildikter. Ekinshi – memlekettik aqparattyq saıasattyń biryńǵaı júıesin qurý. Úshinshi – otandyq BAQ-ta syra men sharaptyń saýda belgisine nemese ataýyna jarnama jasaýǵa tyıymdy alý tastaý. Tórtinshi - memlekettik qatysy bar teleradıoarnalar úshin habar taratý tilin anyqtaýda ókiletti organnyń quziretin bekitý. Sońǵysy – aqparatqa qoljetimdilik týraly zańnamany jetildirý», - dedi ol Aqparat jáne qoǵamdyq damý salasyndaǵy qoǵamdyq keńestiń otyrysynda.
Onyń atap ótýinshe, gazet pen jýrnaldar úshin 2021 jyldan bastap 10 jyl merzimge nóldik mólsherlememen qosylǵan qun salyǵyn engizý kózdeledi. Mundaı jeńildik basylymnyń mindetti túrde onlaın-nusqasy bolǵan kezde ǵana usynylady.
«Sonymen qatar zań jobasynda Qazaqstan aýmaǵynda shyǵarylǵan syra men sharaptyń taýarlyq belgisi men ataýyna jarnama jasaýǵa tyıymdy alý tastaý usynylady. Bul Internet jelisi men sheteldik kabeldik telearnalardy mundaı jarnamanyń ornalastyrýymen, al qazaqstandyq BAQ bul kirisi kózinen aırylyp otyrǵanymen baılanysty. Bul sýsyndardyń jarnamasy gazetterdiń birinshi jáne sońǵy betterine, jýrnaldardyń muqabasyna jarııalanbaýy tıis. Telearnalar úshin mundaı jarnama saǵat 22-00-den 06-00-ge deıin ǵana ruqsat etiledi», - dedi Baqnııaz Qarashına.
Departament basshysynyń aıtýynsha, mundaı jarnamalardyń alkogol ónimderin shamadan tys ishýdiń zııany týraly mindetti eskertýi bolady. Sonymen qatar syra men sharap jarnamasynan keıin ile-shala salaýaty ómir saltyn nasıhattan rolıkter kórsetiledi.
