Qazaqstanda Syna jazýy kúnin jyl saıyn atap ótý asa mańyzdy ulttyq qajettilik - A. Smaıyl
ASTANA. 24 qazan. QazAqparat - Rýna - syna jazýyn memlekettik deńgeıde qasterleı almaı kelemiz. Búgin QR Parlamenti Májilisiniń jalpy otyrysynda Úkimet basshysynyń atyna saýal joldaǵan depýtat Aldan Smaıyl osylaı málim etti.
Depýtattyń aıtýynsha, álemdik órkenıettiń uly murasy sanalatyn túrki jurtynyń kóne jazý úlgileri tereń zerttelgenimen, memlekettik deńgeıde qurmettelmeı otyr. «Rýna nemese syna jazýynyń kúnin jyl saıyn ótkizip turý jónindegi usynysymyz Úkimettiń tarapynan osydan úsh jyl buryn quptaldy, alaıda júzege asyrylǵan joq», - deıdi ol.
Aldan Smaıyldyń aıtýynsha, talaı jyldardan beri Reseı, basqa da sol tektes memleketter Slavıan jazýynyń kúnin búkilhalyqtyq aýqymda atap ótýde. Jaı ǵana atamaı, álemge slavıan mádenıetiniń ulylyǵyn dáleldeýdi osylaı dástúrge aınaldyrýda. Armıan halqy áli kúnge qoldanystaǵy kóne álip-bıiniń ár árpin altynnan quıyp, shirkeýde saqtap otyr.
«Al biz she? Kırıllıtsadan da kóne, keıbir bilikti túrkologtar anyqtaǵanyndaı, grek-slavıan álip-bıine negiz bolǵan rýna - syna jazýyn memlekettik deńgeıde qasterleı almaı kelemiz. Ony mektepten oqyp - bilý de tereń oılastyrylmaǵan. Mundaı samarqaýlyq - rýhanı saladaǵy eleýli olqylyq. Qazaqstan Respýblıkasynda Syna jazýy kúnin jyl saıyn atap ótý asa mańyzdy ulttyq qajettilik. Biz osyǵan qol jetkizip, sodan keıin Túrkitildes memleketterdiń yntymaqtastyǵy jónindegi keńes, Halyqaralyq Túrki akademııasy, TÚRKSOI sekildi bedeldi uıymdar men ǵylymı ortalyqtar arqyly búkil túrki jurtynyń birigip ótkizýine uıtqy bolsaq, tól álip-bıimizdiń, Rýna-syna jazýynyń álemdik mańyzy arta túser edi. Sizden osyǵan erekshe mán berýdi jáne solaı bolýyna yqpal etýdi ótinemiz», - dedi Aldan Smaıyl.
