Qazaqstanda Sybaılas jemqorlyqqa qarsy is-qımyl jónindegi Ulttyq baıandama ázirlenetin bolady
Atalǵan qujat 2015-2025 jyldarǵa arnalǵan Sybaılas jemqorlyqqa qarsy strategııany, Elbasy aıqyndaǵan «100 naqty qadam» Ult josparynyń 13-i qadamyn júzege asyrýǵa baǵyttalady.
Bul rette zań jobasynyń basty maqsaty sybaılas jemqorlyqqa qarsy is-qımyl salasyndaǵy zańnamany jetildirý arqyly, qoǵamda sybaılas jemqorlyqty joıý, jeke jáne zańdy tulǵalardyń quqyqtary men zańdy múddelerin qorǵaý, sonymen birge, memlekettik apparat pen ózge de salalarda sybaılas jemqorlyqtyń kórinýinen týyndaıtyn qaterlerden Qazaqstannyń ulttyq qaýipsizdigin qamtamasyz etý bolyp tabylady. Atap aıtqanda, qoldanystaǵy zańnamada belgilengen sybaılas jemqorlyq quqyq buzýshylyqtardyń basym bóligi formaldy jáne tártiptik sıpatta bolǵandyqtan ári materıaldyq ıgilikter alýdy kózdemeıtindikten, zań jobasymen sybaılas jemqorlyq quqyq buzýshylyqtyń jańa kórinisteri engizilip otyr. Qujat arqyly memlekettiń sybaılas jemqorlyqqa qarsy saıasatyn iske asyrý, sonymen birge, sybaılas jemqorlyqqa qarsy is-qımyl sýbektileriniń qyzmetin úılestirý jónindegi ókilettikter berilgen ýákiletti organ aıqyndalady.
Zań jobasynda «sybaılas jemqorlyq», «sybaılas jemqorlyqqa qarsy saıasat», «sybaılas jemqorlyqqa táýekel» uǵymdary ashylady. «Sonymen qatar, sybaılas jemqorlyqqa qarsy monıtorıng pen taldaý sharalary qamtylady. Bul rette sybaılas jemqorlyqqa qarsy monıtorıng barlyq sybaılas jemqorlyqqa qarsy is-qımyl sýbektilerimen júrgiziletin bolady. Ondaı monıtorıng nátıjeleri sybaılas jemqorlyq táýekelderine taldaý júrgizý úshin negiz bolyp tabylady. Sybaılas jemqorlyq táýekelderin taldaýdy barlyq sybaılas jemqorlyqqa qarsy is-qımyl sýbektileri de júzege asyratyny boljanǵan», - dedi depýtat Svetlana Bychkova.
Aıta keterligi, sybaılas jemqorlyqqa qarsy monıtorıng pen sybaılas jemqorlyq táýekelderin taldaý sharalarynyń qorytyndysy boıynsha Sybaılas jemqorlyqqa qarsy is-qımyl jónindegi Ulttyq baıandama daıyndalyp, ol Memleket basshysynyń qaraýyna engiziletin bolady. Ulttyq baıandama álemdik jáne ulttyq deńgeıdegi sybaılas jemqorlyqqa qarsy is-qımyl salasyndaǵy jaı-kúıin taldaıdy jáne onyń damý úderisin qamtıtyn mańyzdy strategııalyq qujatqa aınalady. Budan bólek, Ulttyq baıandama anyqtalǵan sybaılas jemqorlyqtar týraly jáne onyń jolyn kesý men joıý faktileri qamtylady.
Jalpy, Ulttyq baıandama týraly norma Nıderlandy men Sıngapýr sııaqty elderdiń sybaılas jemqorlyqqa qarsy tájirıbesine negizdelgen. Máselen, Nıderlandyda sybaılas jemqorlyqqa qarsy kúres júıesi rásimdik jáne ınstıtýtsıonaldyq sharalardy, atap aıtqanda Іshki ister mınıstriniń Parlamentke jyl saıyn baıandama usynýyn qamtıdy.
