Qazaqstanda sybaılas jemqorlyq qylmystaryn boldyrmaýdyń keshendi sharalary jasalýda - Q. Qojamjarov
ASTANA. QazAqparat - Qazaqstanda sybaılas jemqorlyq qylmystaryn boldyrmaýdyń keshendi sharalary jasalýda. Bul týraly búgin TMD elderiniń sybaılas jemqorlyqqa qarsy kúres memleketaralyq keńesiniń otyrysynda QR Memlekettik qyzmet isteri jáne sybaılas jemqorlyqqa qarsy kúres agenttiginiń tóraǵasy Qaırat Qojamjarov málim etti.
Onyń aıtýynsha, el Prezıdenti Nursultan Nazarbaevtyń jańa saıası baǵytyna sáıkes, Qazaqstanda jemqorlyqtyń aldyn alatyn tetikter qoldaný eń basty nazarǵa alynýda.
«Mundaı baǵyt jańa jemqorlyqqa qarsy kúres strategııasynda ǵana emes, 29 qazan kúni Parlament qabyldaǵan «Jemqorlyqqa qarsy kúres týraly» zań jobasynda da kórinis taýyp otyr. Qazaqstanda jemqorlyqtyń paıda bolýyna sebep bolatyn jaǵdaılardy joıý boıynsha jumystar júıeli negizge kóshirilýde. Ol úshin jańa ınstıtýttar, jemqorlyqqa qarsy monıtorıng, jemqorlyq táýekelderin taldaý, jemqorlyqqa qarsy mádenıetti qalyptastyrý men qarjylyq baqylaý sharalary engizilýde», - dedi Q.Qojamjarov.
Onyń aıtýynsha, kásibı memlekettik apparatty qurýǵa baǵyttalǵan ınstıtýtsıonaldy reforma da jemqorlyq qylmystarymen kúreske oń áser etpek.
