Qazaqstanda sybaılas jemqorlyq azaıyp keledi - Alık Shpekbaev
ASTANA. QazAqparat - Qazaqstanda sybaılas jemqorlyq jaǵdaıy sońǵy jyldary aıtarlyqtaı azaıyp keledi. Bul týraly Astanada ótken «Túrmelerdi tıimdi basqarý: bas bostandyǵynan aıyrý oryndarynda sybaılas jemqorlyqty joıý» ulttyq jınalysynda QR Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Alık Shpekbaev málimdedi, dep habarlaıdy «QazAqparat» HAA tilshisi.
«Qoǵamdyq keńes týraly zańdy qabyldanyp, memlekettik organ basshylarynyń el aldynda esep berý tájirıbesi engizildi. Turaqty túrde 200-ge jýyq qoǵamdyq keńes jumys atqarady. Normatıvti-quqyqtyq qujat ázirlendi. Ol qujat memorgandardy qoǵamdyq keńestiń jumysymen sanasyp, olardyń eskertýlerin nazarǵa alýdy mindetteıdi», - deıdi agenttik tóraǵasynyń orynbasary.
Alık Shpekbaev elimizde jemqorlyqqa qatysty jaǵdaılardy azaıtý baǵytynda birqatar qadamdar jasalǵanyn tilge tıek etti.
«Eń aldymen, 2015-2025 jyldarǵa arnalǵan strategııaǵa negizdelgen jańa sybaılas jemqorlyqqa qarsy saıasattyń sep bolǵanyn atap ótkim keledi. Sonymen qatar, «Qazaqstan-2050» strategııasynda bul keseldi aýyzdyqtaýǵa qatysty naqty jazylǵan. Atalǵan strategııalardy sátti iske asyrýdyń arqasynda biz Qazaqstanda sybaılas jemqorlyq jaǵdaılarynyń azaıyp kele jatqanyn baqylap otyrmyz. Ákimshilik kedergiler, bıýrokratııalyq úrdister men eń bastysy jemqorlyq jaǵdaılary azaıdy. Bul rette memlekettik qyzmet kórsetý kezinde adamı faktordyń shektelýi óz septigin tıgizip otyr. El turǵyndarynyń quqyqtyq uǵymy men mádenıeti kúsheıip kele jatyr», - deıdi ol.
Qazaqstan Strategııalyq ınstıtýtynyń jarııalaǵan sońǵy zertteý jumystary bul ózgeristi rastap otyrǵan kórinedi. Jemqorlyqqa qarsy belsendi túrde áreket júrgizip jatqan adamdardyń da sany artqan.
«Búgin biz Qazaqstanda qoǵamdyq birlestiktermen, saıası partııalarmen «sybaılas jemqorlyqtan ada aýmaq» qurýdy usyndyq. Bastamamyzdy Astana qalasynyń ákimdigine usyndyq. Ákimdik bastama aıasynda «Adaldyq alańy» atty aktsııa ótkizip jatyr. Bul turǵyda jumys bastaldy. Aımaqtarǵa da barady degen oıdamyn. Materıaldyq turǵyda kótermeleý ınstıtýty tolyqqandy turǵyda jumysyn kúsheıtip, 2016 jyly 167 adamǵa 21 mln teńgege jýyq aqsha tabystaldy. Bul kórsetkish 2015 jylǵymen salystyrǵanda 15 ese kóp. Bizdiń elimiz quqyqtyq memleket bolý jolynda alǵa jyljyp keledi», - deıdi Alık Shpekbaev.
Eske sala ketsek, Astanada PRI (Halyqaralyq túrme reformasy) uıymy QR Memlekettik qyzmet isteri jáne sybaılas jemqorlyqqa qarsy is-qımyl agenttigimen birlese otyryp, tuńǵysh ret «Túrmelerdi tıimdi basqarý: bas bostandyǵynan aıyrý oryndarynda sybaılas jemqorlyqty joıý» taqyrybynda ulttyq jınalys ótkizgen bolatyn. Jıynǵa qatysýshylar túrmedegi sybaılas jemqorlyqty joıý máselelerin ortaq talqyǵa saldy. Ulttyq jınalysta Alık Shpekbaev memlekettik qyzmetterdiń elektrondyq ádiske aýysýy elimizde sybaılas jemqorlyq jaǵdaıyn edáýir azaıtqanyn aıtyp otyr.
