Qazaqstanda suıytylǵan gazdyń shekti baǵasy 2017 jylǵy deńgeıge deıin tómendeıdi

NUR-SULTAN. QazAqparat - 2020 jylǵy 3-toqsanda suıytylǵan munaı gazyn kóterme saýdada ótkizýdiń baǵalary qosylǵan qun salyǵyn (QQS) esepke almaǵanda 28 000 teńgeni quraıdy, dep habarlaıdy QazAqparat tilshisi dep habarlaıdy QazAqparat tilshisi QR Energetıka mınıstrliginiń baspasóz qyzmetine silteme jasap.

«Gaz jáne gazben jabdyqtaý týraly» QR Zańyna sáıkes Qazaqstan Respýblıkasynyń ishki naryǵynda elektrondyq saýda alańdarynan tys suıytylǵan munaı gazyn jetkizý jospary aıasynda saýdalanatyn suıytylǵan munaı gazynyń shekti baǵalary memleket tarapynan rettelip otyrady.

«Energetıka mınıstrligi shekti baǵany Ulttyq ekonomıka mınıstrliginiń kelisimimen toqsan saıyn bekitedi jáne ol Qazaqstan Respýblıkasynyń barlyq aýmaǵynda qoldanylady. Shekti baǵa 2018 jyldyń І-toqsany - 2020 jyldyń І-toqsany aralyǵynda QQS esebinsiz tonnasyna 38 701,67 teńge deńgeıinde saqtaldy. Shekti baǵa 2020 jyldyń 3-toqsanynda QQS esebinsiz tonnasyna 28 000 teńge deńgeıinde belgilendi. Buryn, shekti baǵa 2017 jyldyń 1-toqsanynda QQS esebinsiz tonnasyna 28 000 teńge deńgeıinde belgilengen bolatyn», - dep atap ótedi mınıstrlikten.

Bul rette, mınıstrlik bekitetin shekti baǵalardyń deńgeıine áser etetin syrtqy naryqtaǵy baǵalar shamadan tys quldyraǵan jaǵdaıda otandyq óndirýshiler úshin saldardy barynsha azaıtý maqsatynda shekti baǵany 2017 jyldyń 1-toqsanynda belgilengen baǵalar deńgeıinen, ıaǵnı QQS-syz tonnasyna 28 000 teńgeden tómendeýge jol bermeý jóninde tıisti normalar kózdelgen.