Qazaqstanda suıytylǵan munaı gazynyń shekti baǵasy qaıta qaraldy

ASTANA.KAZINFORM – Qazaqstanda suıytylǵan munaı gazynyń ishki naryqtaǵy kóterme jáne bólshek saýdadaǵy shekti baǵalary qaıta bekitildi. Bul týraly QR energetıka mınıstrliginiń 2025 jylǵy 30 shildedegi №297-n/q jáne №298-n/q buıryqtarynda jazylǵan.

Qujatqa sáıkes, bıyl 1 tamyzdan bastap 31 jeltoqsanǵa deıin taýar bırjalarynan tys, ishki naryqqa jetkizý jospary aıasynda suıytylǵan munaı gazynyń kóterme saýdadaǵy shekti baǵasy qosylǵan qun salyǵyn eseptemegende tonnasyna 59 722 teńge kóleminde belgilendi.

Osylaısha óńirler boıynsha avtogaz quıý stantsııalarynda gazdyń bólshek saýdadaǵy shekti baǵalary da qaıta qaralady. Atap aıtqanda, Astana men Almaty qalalarynda – 112 teńge/lıtr, Mańǵystaý oblysynda – 72 teńge/lıtr, Aqtóbe, Atyraý jáne Batys Qazaqstan oblystarynda – 85 teńge/lıtr, Jambyl, Qyzylorda, Túrkistan oblystary men Shymkent qalasynda – 102 teńge/lıtr.

Sonymen qatar oblys ortalyǵynan 200 shaqyrymnan astam qashyqtyqtaǵy shalǵaı aýdandar úshin de jeke shekti baǵalar belgilendi. Almaty, Shyǵys Qazaqstan, Soltústik Qazaqstan jáne basqa da birqatar oblysta 117 teńge/lıtr, Mańǵystaý oblysynda – 77 teńge/lıtr, Atyraý oblysynda – 90 teńge/lıtr.

Energetıka mınıstrligi bul baǵalar tek taýar bırjalarynan tys, belgilengen jospar sheńberinde jetkiziletin gazǵa qatysty qoldanylatynyn eske salady.

Buǵan deıin, Energetıka mınıstrligi suıytylǵan gaz baǵasyn 1 tamyzdan bastap ózgertýdi usynǵanyn jazǵanbyz.

Eske sala keteıik, suıytylǵan gazdy Qazaqstan aýmaǵynan áketýge tyıym salý uzartylǵan.