Qazaqstanda sút óndirisiniń ózindik quny orta eseppen 30 paıyzǵa ósti

NUR-SULTAN. QazAqparat – Qazaqstanda sút óndirisiniń ózindik quny kásiporynnyń shamasyna qaraı 23-ten 65 paıyzǵa deıin artty. Bul jaıynda QR Sút odaǵynyń dırektory Vladımır Kojevnıkov málim etti, dep habarlaıdy QazAqparat tilshisi.

Onyń atap ótýinshe, sút óndirisi áleýmetti mańyzy bar sala sanalady jáne qazaqstandyq tutynýshylardyń ónimniń qajetti kólemimen qamtamasyz etip otyr.

Otandyq óndirýshiler naryqtyń 95 paıyzyn sút jáne sút ónimderimen qamtıdy.

Degenmen, odaq dırektory sútti qaıta óńdep jasalatyn ónimderdi shyǵarýǵa kelgende jaǵdaı kúrdeli ekenin aıtady.

«Logıstıkalyq tizbek úzilip qaldy. Biz kóptegen ıngredıentterdi, onyń ishinde qaptamany Reseıden alamyz. Munyń bárin qaıtadan jolǵa qoıý úshin ýaqyt kerek. Biraq, bul ónimge de táýeldiligimiz tómendeı tústi. Alaıda, reseı-ýkraın oqıǵalaryna baılanysty ózgerister kóp qıyndyq týǵyzyp otyr. Munyń bári ónimniń ózindik qunyna, soǵan oraı baǵasyna áser etýde. Dúkenge barǵan kezińizde baǵanyń kún saıyn bolmasa da, apta saıyn ózgeretinin kórip júrsizder. Bizde ónimniń ózindik qunynyń 65-75 paıyzyn shıkizat alady. Al dál osy shıkizat búginde 65 paıyzǵa qymbattap otyr. Bul - Sút odaǵynyń emes, FAO-nyń (BUU Azyq-túlik jáne aýyl sharýashylyǵy uıymy) málimetteri. Bul uıym shynaıy jaıtty ásireleýge múddeli emes», - dedi ol «Atameken» UKP alańynda ótken baspasóz máslıhatynda.

Odaq dırektorynyń dereginshe, sút óndirisiniń ózindik quny shaǵyn sharýashylyqtarda 65, al iri sharýashylyqtarda 23 paıyzǵa artqan.

Mundaı aıyrmashylyq iri sharýashylyqtarda qoımalardyń bar-joǵyna, mal azyǵy qorynyń jetkiliktiligine baılanysty.

Al shaǵyn sharýashylyqtardyń mundaı múmkindikteri joq.

«Tolyqtaı alǵanda sútti qaıta óńdeýdiń ózindik quny 30 paıyzǵa ósip otyr», - dedi Vladımır Kojevnıkov.