Qazaqstanda sút óndirisin sýbsıdııalaý qaıta qolǵa alyndy
Búgin Elordada «Mal sharýashylyǵy bıznesine tabysty strategııany engizý arqyly maksımaldy ónim alý» taqyrybynda sút óndirýshilerdiń IV kongresi ótip jatyr.
Kongreste sala mamandary qazirgi zamanaýı tehnologııalardy qoldana otyryp, onyń ishinde maldy baılamaı ustaıtyn jáne iri taýarly sút fermalaryn qurý arqyly sút ónerkásibin damytý máselesin sheshý joldaryn qarastyryp jatyr.
«Sút óndirý sharýashylyǵy - elimizge kólemdi tabys ákeletin aýyl sharýashylyǵy salalarynyń biri. Osy maqsatta bıyl mınıstrlik salany damytýǵa arnalǵan birqatar baǵdarlamalar qabyldady.Sonyń biri - bıyl sút óndirisin qaıta sýbsıdııalaı bastadyq. Ózderińiz biletindeı, ótken jyldary belgili sebeptermen ony toqtatqan bolatynbyz. Qaıta sýbsıdııalaý óz nátıjesin kórsetip otyr. Budan bólek, atalǵan salany odan ári jetildirý maqsatynda jaqynda mınıstrlik uzaqmerzimdi baǵdarlama qabyldandy. 10 jylǵa arnalǵan baǵdarlama boıynsha sút óndirisin 1 mln tonnaǵa jetkizýdi kózdep otyrmyz», - dedi QR Aýyl sharýashylyǵy mınıstrligi Mal sharýashylyǵy ónimderin óndirý jáne qaıta óńdeý departamentiniń dırektory Erkebulan Ahmetov.
Onyń aıtýynsha, atalǵan baǵdarlamany júzege asyrý úshin búginde sút ónimin arttyrýǵa arnalǵan 102 joba pýly jasaqtalyp, «QazAgro» holdıngi tıisti qarjylandyrýdy júrgizip otyr.
Sonymen qatar, mınıstrlik ókili otandyq aýyl sharýashylyǵy ónimderiniń eksporty ulǵaıǵanyn da aıtyp ótti.
«Búginde qaıta óńdelgen taýarlardyń syrtqy saýdasy 13% artty. Onyń kólemi ótken jylmen salystyrǵanda 30 paıyzǵa artyq. Al odan túsken tabys kólemi 1 mlrd 600 mln dollarǵa ósti. Máselen, bıdaı Ortalyq Azııa jáne Ońtústik-Shyǵys Azııa memleketterinde úlken suranysqa ıe. Al et jáne et ónimderin syrtqa shyǵarý kólemi jylyna 5 myń tonna bolatyn, al bıyl jyl basynan beri bul kórsetkish 20 myń tonnaǵa artty. Onyń ishinde 11 myń tonnasy - sıyr eti», - dedi ol.
Atalǵan sharaǵa fermerler, et jáne sút óndirý salalarynyń mamandary men sarapshylar jáne seriktes kompanııalardyń 200-den astam ókili qatysyp jatyr.
