Qazaqstanda sút óndirisin damytý úshin shıkizat bazasy álsiz – mınıstr

ASTANA. QazAqparat – 2023 jyly 65 taýarly-sút fermasyn qurýǵa 100 mlrd teńge bólý josparlanýda. Bul týraly QR Aýyl sharýashylyǵy mınıstri Erbol Qarashókeev aıtty, dep habarlaıdy QazAqparat tilshisi.

Mınıstrdiń aıtýynsha, elimizde sary maı, sút, irimshik jáne súzbe, ashytylǵan sút ónimderi óndirisi azaıǵan. Bul shıkizat bazasynyń damymaýymen baılanysty.
«Sút ónimderin óndirýge arnalǵan shıkizat bazasyn keńeıtý úshin óńirlik ÁKK arqyly iri taýarlyq-sút fermalary qurylysyn jeńildikpen qarjylandyratyn Soltústik Qazaqstan oblysynyń tájirıbesi keńeıtilýde. Bul joba nátıjesinde otandyq sút zaýyttary sapaly shıkizatpen qamtamasyz etiledi jáne sút boıynsha ımportqa táýeldilik aıtarlyqtaı tómendeıdi», - dedi E. Qarashókeev Úkimettiń búgingi otyrysynda.
Osy maqsattarǵa 2023 jylǵa óndiristik qýaty jylyna 373 myń tonna sútti quraıtyn 65 taýarly-sút fermasyn qurýǵa 100 mlrd teńge bólý josparlanýda.
Kelesi jyldary josparda qosymsha 50 taýarly-sút fermasyn salý bar, oǵan 113 mlrd teńge qarajat qajet.
Buǵan deıin mınıstr 2022-2024 jyldarǵa arnalǵan azyq-túlik qaýipsizdigin qamtamasyz etý jospary týraly baıandaǵan edi. Onyń aıtýynsha, Qazaqstanda un, maı, makaron, qant óndirisi artyp keledi.