Qazaqstanda sút óńdeıtin óndiris qýaty tolyq paıdalanylmaı otyr - R. Shaekın
ASTANA. QazAqparat - Qazaqstanda sút óńdeıtin óndiris qýaty tolyq paıdalanylmaı otyr. Búgin Parlament Májilisinde «Aýyl sharýashylyǵy kooperatsııasy týraly» zań jobasynyń tanystyrylymy barysynda depýtat Raýan Shaekın osylaı málimdedi.
«Aýyl sharýashylyǵy mınıstrligindegiler agrarlyq saladaǵy basty problema - usaq taýarlylyq dep aıtyp keledi. Degenmen, mınıstrlik usynǵan zań jobasy muny sheshpeıdi. Mysalǵa, Qazaqstandaǵy sút óndirisiniń búgingi qalyptasqan jaǵdaıyna qaraıyq. Máselen, elimizde óndiriletin súttiń jalpy mólsheri 4,7 mln. tonnany quraıdy, al sonyń 4,1 mln. tonnasy jurtshylyqtyń jekemenshik qorasynda saýylady. Bul 87 paıyzǵa teń. Osy jeke qoralarda saýylatyn 4,1 mln. tonna súttiń tek 1,3 mln. tonnasy nemese 31 paıyzy ǵana qaıta óńdeýge beriledi, al qalǵanyn halyq óz qajetine jaratady: maı shaıqaıdy, kilegeı, qatyq alady», - deıdi depýtat.
Onyń sózine qaraǵanda, sút salasyndaǵy óndiristik qýat nysandary da tolyq paıdalanylyp turǵan joq. Mysaly, suıyq túrde óńdelgen sút pen kilegeı - 45,7 paıyz, qatty túrdegi sút ónimderi - 29,4 paıyz, maı - 36,1 paıyz, syr men irimshik- 40,9 paıyz bolsa, qalǵan sút ónimderi 59,2 paıyzdy qurap otyr.
«Osyny eskersek, zań jobasyndaǵy usynylǵan normalar aýyl sharýashylyǵyndaǵy ahýalǵa aıtarlyqtaı áser etedi deý qıyn. Óıtkeni, munda basty másele - usaq aýyl sharýashylyǵy taýaryn óndirýshilerdi biriktirýge yntalandyrý tetikteri qalys qalǵan», - dedi R. Shaekın.
