Qazaqstanda sút bezi obyry kórsetkishi tómendedi
ALMATY.QazAqparat - Onkolog mamandar sút bezi obyrynan bolatyn kórsetkishterdi jarııa etti, dep habarlaıdy QazAqparat tilshisi.
QR UǴA akademıgi, Qazaqstan Respýblıkasy Densaýlyq saqtaý mınıstrligi Qazaq onkologııa jáne radıologııa ǵylymı-zertteý ınstıtýtynyń dırektory Dılıara Qaıdarovanyń aıtýynsha, 2011-2017 jyldar aralyǵyndaǵy kezeńde sút bezi obyrynan bolatyn ólim kórsetkishiniń 9,7 paıyzǵa tómendegeni baıqalǵan. Jańa ereje boıynsha sút bezi obyryn anyqtaý skrınıngi 40 jasqa tolǵan kezden bastap júrgiziledi.
Sút bezi obyry aýrýy (SBO) onkologııa syrqattarynyń jalpy qurylymynda áli de birinshi orynda tur. Onyń úlesi - 13,8% (14,5% - 2016 j.). Sondaı-aq, onkologtardyń aıtýynsha, SBO aýrýynyń kórsetkishi elimizdiń júz myń turǵynyna shaqqanda, 2016 jylǵy 26,1 paıyz alǵ sol kórsetkishpen salystyrǵanda 2017 jyly 24,5% boldy. Oblystar boıynsha aýrýlar qurylymynda SBO Almaty, Qaraǵandy, Qyzylorda, Qostanaı, Pavlodar, Ońtústik Qazaqstan óńirlerinde jáne Astana men Almaty qalalarynda birinshi orynda tur.
SBO aýrýynyń kórsetkishi Pavlodar (100 myń adamǵa shaqqanda 35,7%), Soltústik Qazaqstan (100 myń adamǵa shaqqanda - 35,2%), Qaraǵandy (100 myń adamǵa shaqqanda - 33,8%), Shyǵys Qazaqstan ( 100 myń adamǵa shaqqanda - 32,7%), Aqmola (100 myń adamǵa shaqqanda - 31,2%), Qostanaı (100 myń adamǵa shaqqanda - 31,8%), Batys Qazaqstan (100 myń adamǵa shaqqanda - 26,3%) oblystarynda jáne Almaty qalasy (100 myń adamǵa shaqqanda - 35,1%) men Astana qalasynda (100 myń adamǵa shaqqanda - 28,4%) respýblıkalyq kórsetkishten asyp ketkendigi anyqtaldy. Aýrýdyń tómen kórsetkishi Mańǵystaý (100 myń adamǵa - 14,2% ), Ońtústik Qazaqstan (100 myń adamǵa -14,7% ), Qyzylorda ( 100 myń adamǵa - 15,4% ) jáne Atyraý (100 myń adamǵa - 15,6%) oblystarynda tirkelgen.
2011 - 2017 jyldar aralyǵyndaǵy kezeńde SBO-dan bolǵan ólim kórsetkishi 9,7 paıyzǵa azaıǵany baıqalady (2011 jyly - 1377 jaǵdaı -100 myń adamǵa shaqqanda - 8,3% ), 2017 jyly - 1243 jaǵdaı (100 myń adamǵa shaqqanda - 6,9% ). Ólim kórsetkishin tómendetý SBO dıagnostıkasyn ýaqytyly jáne erte júrgizýdiń arqasynda múmkin bolyp otyr. Máselen, 2011 jyly aýrýdyń I -II kezeńin anyqtaý - 73,4 paıyzdy (2 568 jaǵdaı), al 2017 jyly bul kórsetkish 84,7 paıyzdy (3 677 jaǵdaı) kórsetti. 2011 jyldan beri SBO-ǵa ýaqytyly dıagnostıka júrgizý 11,3 paıyzǵa artqan, bul sonymen birge mammografııalyq skrınıngti júzege asyrýdyń nátıjesinde de múmkin bolǵan.
«Onkologtar onkopatologııalardyń, onyń ishinde sút bezi obyrynyń alǵashqy kezeńderin anyqtaý máselelerine erekshe kóńil bóledi. Sondyqtan, qazir,jańa ereje boıynsha, sút bezi obyryna baılanysty skrınıng 40 jasqa tolǵan kezden bastap júrgiziledi. Myna máseleniń mańyzdylyǵyn eskergen jón, ólim kórsetkishiniń tómendeýi sút bezi obyryn erte jáne der kezinde anyqtaýdyń nátıjesinde ǵana múmkin bolyp otyr», - dedi Dılıara Qaıdarova.
